Қаладағы көп қабатты үйлерде жарғаққанатты жәндіктер қаптап кеткен
Көкшетауда қыстың қақаған аязында тұрғындарға қызыл құмырсқалар тұрғындарды әбігерге салуда. Жәндіктер "Көктем" шағын ауданындағы тұрғын үй мен Куйбышев көшесі 37, Кенесары 11 мекен жайларында қаптап кеткен. Олармен күресудің тиімді жолын таба алмаған кейбір тұрғындар, тіпті, пәтерлерін сатып, көшіп кетуге мәжбүр болыпты. Жарғаққанаттылар, әсіресе, ас үй мен жуынатын бөлмеде көп кездеседі екен.
«Бұрын күріш, макарон сынды азық-түліктерді көбірек алып қоятынмын. Қазір аз-аздап алатын болдым. Өйткені, құмырсқалар олардың да ішіне кіріп кетеді. Көршілердің барлығы құмырсқалардан зардап шегіп отыр. Осы үйдегі пәтерлердің барлығында бар», - дейді Куйбышев 37 үйдің тұрғыны Нина МНАЛИНОВА.
Көкшетаулықтардың құмырсқалар «шайқасы» бірнеше жыл бұрын басталыпты. Сан түрлі улы затты сатып алғанымен жәндіктерден құтыла алмапты. Ақыры аралап кетпесін деп азық-түліктерін жасыруға көшіпті. Жергілікті билік өкілдері бұл проблемадан хабардар екен. Құмырсқалардың алдында қауқарсыз екендіктерін жасырды ма, әйтеуір әкімдіктегілердің пікірінше тазалық болмағандықтан пәтерлер құмырсқаның илеуіне айналған.
"Бұл тазылыққа байланысты. Тазалық болмаған жерде осылай қызыл құмырсқалар қаптайды. "Арна" колледжінің артындағы жатақханада құмырсқалар тіпті көп. Олармен күресу үшін пәтер иелері қаржы жинап, үйге толық дезинфекция жасайтын кәсіпорындарға хабарласу керек," - дейді Көкшетау қалалық әкімдігі баспасөз қызметінің жетекшісі Мырзабек МЫРЗАХМЕТОВ.
Көкше жұрты түрлі мекемелерге шағымданғанымен ешкім де құмырсқалардың арқаның аязында қайдан келетінін табар емес. "Шатырдағы өлген құстардың кесірінен көбейді," - деп топшылайды кейбір тұрғындар.
