Әлеуметтік желіде мектеп әжетханасына қатысты сыннан кейін елордада тексеріс жүргізілді
Әлеуметтік желідегі мектеп әжетханасына қатысты сыннан кейін Астананың 16 мектебінде санитарлық талаптардың сақталмағаны анықталды, деп хабарлады елорда әкімдігінің ресми интернет ресурсы.
«Таяуда Facebook әлеуметтік желісінде елорданың №7 гимназиясындағы әжетханалардың суреттері жарияланған болатын. Суретте әйелдерге арналған санитарлы тораптардағы әжетханалардың арасында қоршаудың жоқтығы тайға таңба басқандай көрініп тұр. Суреттер жарияланған соң, Астана қаласы білім басқармасының басшысы Әнуар ЖАНҒОЗИН елордадағы барлық мектептердің санитарлы нормаларды сақтау-сақтамауын тексеруді бұйырды. Астананың алты мектебіндегі әжетханаларда санитарлы нормалар сақталмаған. Шенеуніктер орта білім беретін бірқатар оқу орнында басқа да санитарлы талаптардың бұзылғандығын анықтады», - делінген хабарламада.
Тексеріс 4 желтоқсанда жүргізілді. Хабарланғандай, қалалық білім басқармасында құрылған жұмыс тобы тексеріс барысында қаладағы кейбір мектептердің оқу жылы басталмай тұрып, ағымдағы жөндеу жұмыстарын уақытында аяқтауға үлгермегендігін анықтады.
«Ағымдағы жылдың көктемі мен жазында барлық нысандар тексерістен өтіп, анықталған ескертулер бойынша актілер жасалған болатын. Білім беру мекемелерінің тарапынан ұсынылған бюджеттік арыздарға сәйкес нысандарды ағымдағы жөндеуден өткізу жұмыстарына, сондай-ақ, 42 нысандағы санитарлы тораптарды ауыстыру мен жаңарту шараларына қаражат қажетті көлемде бөлінген-ді», - деп түсіндірді қалалық білім басқармасынан.
Алайда жұмыстар барлық оқу орындарында жүзеге асырылмаған.
«Жоғарыда көрсетілген 42 нысанның алтауында бүгінге дейін әжетханалар қоршалмаса, 10 мектептің санитарлы тораптарындағы қоршаулардың есіктері орнатылмаған. Басқа нысандардағы санитарлы тораптар талаптарға сай келеді. Жоғарыда аталғанның негізінде қысқы демалыстың аяғына дейін нормаларды бұзу фактілерін дұрыстау бойынша барлық қажетті шаралар қолданылатын болады», - деп атап өтті басқармадан.
Бұдан басқа да санитарлы нормалардың бұзылғандығы анықталды, мысалы, кей мектептердегі санитарлы тораптарда жеке гигиена құралдары қойылмаған.
«Жыл сайын оқу жылы басталмас бұрын арнайы құрылатын жұмыс тобы оқу орындарын тексерістен өткізеді. Комиссия құрамына ТЖ және қоғамдық денсаулықты қорғау департаменттерінің, денсаулық сақтау және білім басқармаларының қызметкерлері кіреді. Нысанды қабылдау кезінде өрт қауіпсіздігінің жүйесі, тамақтану орындарының жағдайы, жылыту жүйесі, санитарлы тораптар мен т.б. тексеріледі», - деп толықтырды Астана әкімдігінен.
Дереккөз: ҚазТАГ
