Ақмола облысында бораннан он бір мектептің төбесі ұшып кеткен
Өткен аптада арқада болған бораннан Ақмола облысына қарасты Аршалы, Ерейментау аудандарында 11 мектептің шатыры ұшып кеткен.
Жел жылдамдығына 30 метірге жеткен боранда Аршалы ауданының алты мектебіне зақым келген. «Жібек жолы» ауылындағы Иманжүсіп ҚҰТПАНҰЛЫ атындағы 800 орындық білім ордасы 2011 жылы қолданысқа берілген. Небәрі, 7 жыл бұрын салынған ғимарат жаңа дегенімен, сапасы сын көтере алмай қалған сынайлы. Боранға шыдас бере алмаған шатыр әп-сәтте қирап қалған.
Жалтыркөл ауылындағы орта мектептің 800 шаршы метр болатын шатыры түп орнымен жұлынып, айдалаға ұшып кеткен. Ауыл халқы соңғы жиырма жылда бұндай бұрқасынды көрмегендерін айтады.
Жергілікті шенеуніктер табиғаттың тосын мінезі әкелген залалдың құны есептіліп болыпты. Аршалы ауданы әкімінің орынбасары Байжұма АСЫЛБЕКТІҢ айтуынша, жөндеуге қажетті соманы бөлу туралы өтініш хат облыс басшылығына жолданған. Бірақ, әзірге, жауап жоқ.
– Облыс әкімдігіне ресми қағазды жөнелттік. Қазір бұл мәселені шешу жағы қарастырылып жатыр. Жалтыркөл мектебі бұрыннан келе жатқан ескі мектеп. Оның шатырына ешкім жөндеу жасаған жоқ. Енді жаңа шатыр салынады. Басқа Сарыоба станцясында мектеп бар. Волгазоновка мектебінде, Белый Яр ауылында мектеп бар, - дейді Аршалы ауданы әкімінің орынбасары Байжұман Асылбек.
Ал Торғай ауылындағы мына білім ордасы шатырымен бірге жылудан да айырылып қала жаздады. Қатты бораннан мектепті жылытып отырған қазандықтың мұржасы ортасынан қақ бөлінген.
– Ауданда төтенше жағдай жарияланды. Соған байланысты комиссия келіп барлығын көріп кетті. Шығынды есептеді. Көктемде жөндеу жұмыстары басталады, - дейді Торғай ауылдық округінің әкімі Марат ӘУБӘКІРОВ.
Қатты жел Ерейментау ауданының Еркіншілік ауылындағы орта мектептің 2732 шаршы метр төбесінің 1500 шаршысын бір-ақ күнде қиратып, жан-жаққа ұшыпты. Бұдан бөлек, Ерейментау ауданындағы Ақсуат, Малтабар ауылдарында орта мектептердің, Ерейментау қаласында балалар шығармашылық үйінің шатыры қираған. Қос ауданда арнайы комиссия болғанымен облыстық әкімдік мамандары жөндеу жұмыстарына қажетті қаражат сомасын дөп басып айта алмай отыр.
Фото автордікі.
