Студенттерді университет туралы мақтап мақала жаз деп тентіретіп жіберуді қойсаңыздаршы
ҚазҰУ-дың оқытушыларына қарным ашып отыр. Студенттеріңізді ҚазҰУ туралы мақтап мақала жаз деп тентіретіп жіберуді қойсаңыздаршы! Құдайдың құтты күні редакцияға 2-3 студент хабарласады. "Бізге ҚазҰУ туралы мақала шығар деп жатыр. Әйтпесе, сессиядан өткізбейді", – деп тұрады. Мақаласын оқысаң, бас салып мақтау, тарихын сыдыртып шығу. Гуглда ҚазҰУ туралы не тұр, соны айна-қатесіз көшіріп әкеп тұрады ғой. Аузың көпіріп не жазу керек екенін түсіндіріп жібересің, бірақ сол "тақырыптарымен" қайтып кеп тұрады.
Егер шынымен ҚазҰУ-дың атын шығарғыларыңыз келе ме, онда мынадай тақырыптар жаздырсаңыздар, жазсаңыздар болады:
– Мамандығыңыз туралы жазғыңыз келсе, сол мамандыққа қалай түсуге болады, қанша балмен түсті, ол мамандықты бітіргеннен кейін қайда жұмыс істеуге болады, мамандығы қаншалықты сұранысқа ие (статистикасымен), бір семестрде не оқыды, не үйренді (Заң факультетінің студенттері хабарласқан. Соларға "Құқығыңды білесің бе?" деп балаларды алаңдататын сұрақтарға жауап іздеп көр. Үйдегі іні-қарындасың үйтсем бола ма, бүйтсем бола ма деп сұрайтын шығар. Солардың сұрағына жауап тауып кел. Яғни, сабақ беретін профессор-оқытушыларыңнан сұра" деп айтқанбыз), мамандығының ерекшелігі неде деген сияқты сұрақтарға жауап беріп тұрса, жарияланады;
– ҚазҰУ-дың био-химия факультеті мықты. Зертханааларына кіріп, теорияның практикада қалай жүзеге асатынын бақылап, өзің де істеп көр. Сондай танымдық дүние болса кім шығармайды? Оны оқыған бала ҚазҰУ-ға түсуге қалайда әрекеттенеді ғой;
– Филфакта оқитын болсаң, сол факультетте 7-8 тілді білетін студент бар шығар. "Филология факультетінің студенті осыншама тіл біледі" деп тіл үйренудегі машығымен бөліс. Күніне неше сөз жаттайды, таңертең 5 тұрып оқыған тиімді ме, әлде 7 тұрып оқыған тиімді ме? Жадыны жақсарту үшін қалай тамақтанады немесе бір спорт түрімен айнлыса ма екен? Қандай кітап оқып, кино көреді? Қандай сайттар тіл үйренуге жақсы көмекші? Міне, осындай сұрақтарға жауап беріп тұрса, неге шықпасын?!
– ҚазҰУ-да қандай мықтылар оқыды, олар туралы аңыздарды білесің бе деп материал дайындап әкелсе, қанекей!
Ал ҚазҰУ тарихы немесе Қазақстан 1991 жылы тәуелсіздігін алды деп басталатын мақалаларыңыз жарамайды. 5-сыныпта оқитын оқырмандарымыз ондай хат жазбайды! Олардың өзінің айтары бар. Студенттеріңізге дұрыс бағдар беріңіздерші, оқытушы-профессорлар! ҚазҰУ-ды бұлай сүйкімсіз етпеңіздерші!..
Дереккөз: Жадыра НАРМАХАНОВАНЫҢ Facebook-тағы жеке парақшасынан алынды. Автордың рұқсатымен жарияланды.
Фото: kazsu.kz.
