Газет-журналдардың рейтингін анықтауда таралымдары мен сайттарының оқырман саны да қатар есептелсе
Жергілікті жерлердегі бюджеттік ұйымдар қызметкерлерінің, әсіресе, мүғалімдер мен дәрігерлердің орынды реніштерін туғызып отырған осы мәселені түбегейлі шешудің мынадай ұтымды әдісін ұсынсам ба деймін:
Қазіргі Интернет жалпыға ортақ игілікке айналып, әлеуметтік желілердің аты озып тұрған ақпараттық заманда мемлекеттік газет-журналдардың рейтингін олардың таралымына ғана қарап анықтау қағидатын қайтадан қарау керек сияқты. Бұл ретте республикалық және өңірлік ресми басылымдардың бәрінің де өз сайттары бар екендігі ескерілуге тиісті. Яғни, олардың танымалдылығын қағаз нұсқадағы таралымымен ғана бағаламай, тиісті сайттарының оқырмандарының санын да есепке алу қажет.
Бұған қоса,республикалық және жергілікті деңгейлерде мемлекеттік ақпараттық саясатты газет-журналдар арқылы жүргізу бойынша өткізілетін мемлекеттік сатып алу конкурстарының талаптары да қайтадан қарастырылып, тиісті басылымдардың таралымына қоса, сайттарындағы оқырмандарының саны да ескерілгені жөн.
Осы орайда тағы бір назар аударатын маңызды жайт: газет-журналдардың рейтингін анықтауда басылымдардың қағаз нұсқаларының таралымы мен электрондық нұсқалары оқырмандарының санының қатар есептелуі олардың баспаханаға және пошта қызметіне жұмсалатын шығындарын қысқартуға қолайлы мүмкіндік туғызады. Мұның өзі қазіргі кезде экономикалық тұрғыдан өз таралымдарын көбейтуге мүдделілігі шамалы болып отырған басылымдар редакцияларының қаржылай жағдайын жақсартуға елеулі ықпалын тигізеді. Сондай-ақ ұсынылып отырған әдіс мемлекеттік тапсырыспен шығарылатын басылымдар редакцияларының өз сайттарының тартымдылығын қамтамасыз етуге ынталарын күшейтіп,тұтастай алғанда, олардың бәсекеге қабілеттілігін де арттыра түсері сөзсіз.
Мен осылай ойлаймын. Ал Сіздер қалай ойлайсыздар, құрметті достар және әріптестер? Егер қолдау білдірсеңіздер, онда мен осы ұсынысымды Ақпарат және коммуникациялар министрлігінің қарауына енгізбек ниеттемін.
Дереккөз: Кәрібай Мұсырманның Facebook-тағы жеке парақшасынан алынды. Автордың рұқсатымен жарияланды.
Фото: kerekinfo.kz
