Ниқаб, паранджа және басқа бетперделер біздің қоғамға тән емес
Алдағы уақытта Діни қызмет және діни бірлестіктер туралы заңнамаға бірқатар өзгерістер енгізілмек. Жаңа заңнамаға атеистерді қорғау талабы да енгізілмекші. Ал діни догмаларды сақтамағаны үшін адамға қысым жасайтындар заң алдында жауап береді, деп xабарлайды ҚазАқпарат. Бұл туралы «Діни қызмет және діни бірлестіктер туралы ҚР кейбір заңнамалық актілеріне өзгерістер мен толықтырулар енгізу туралы» заң жобасын дипломаттарға түсіндіруге арналған брифингте еліміздің дін істері және азаматтық қоғам министрі Нұрлан ЕРМЕКБАЕВ мәлімдеді.
«Бүгінде Қазақстан азаматтарының 12 пайызы өздерін атеист немесе агностик деп санайды. Олардың да құқықтары қорғалуы қажет. Дінге сенетін адамдар заңмен қалай қорғалса, дінге сенбейтіндер үшін де сондай жағдай жасалуы шарт. Сол себепті Біріккен Ұлттар Ұйымының ұстанымына сәйкес, дін қызметі мен діни бірлестіктер туралы заңға тиісті өзгерістер қарастырылған. Соның ішінде діни догмаларды толыққанды сақтамағаны үшін біреуге қысым жасалса, ондай адамдар заңмен қорғалады. Әйтпесе, қазіргі кезде діни рәсімдерді сақтамайтындарға қысым жасау әрекеттері жиілеп кетті», - дейді министр Ермекбаев. Оның айтуынша, адамның діни ұстанымына қысым жасау әрекеттері қайғылы оқиғамен де аяқталып жатады.
«Мәселен, Оңтүстік Қазақстан облысында ер адам діни көзқарасына байланысты өз әйелін өлтірсе, Алматы облысында тағы бір еркек әйелін xиджаб кимегені үшін жазалады. Міне, осы іспетті оқиғаларға жол бермеу керек», - деп атап көрсетті министр.
Министр діни қызмет және діни бірлестіктерге арналған заңнамаға қандай өзгерістердің енгізілетінін кеңінен айтып берді. Оның айтуынша, мемлекеттік қызметшілердің діни ұстанымына қатысты нақты үш шектеу болады. Бұдан бөлек, министр адамның бет-әлпетін тұмшалайтын киімдерге қатысты түсінік берді.
Сонымен қатар министрлік өкілі қоғамдық орындарда адамды тануға кедергі келтіретін киімдерге тыйым салуды көздейтін заң жобасын дайындаған. Сонымен қатар, құжат кәмелетке толмаған балаларды діни қызметке заңсыз тартуға жауапкершілікті күшейтіп, діни жоралғылар бойынша некеге тұруға тыйым салады деп жазады sputnik.kz.
«Нәтижесінде сарапшылар азаматтардың қауіпсіздігі осындай шаралар енгізуді талап етеді деген шешімге келді», — деді Ермекбаев.
Ол мұндай шара «шын мәнінде діни мәселеге қатысты емес екенін, бұл қоғам қауіпсіздігі мәселесі саналатынын» атап өтті.
«Ниқаб, чадра, балаклава, паранджа және бетперделер сияқты киімдер жеке тұлғаны сәйкестендіру кезінде құқық қорғау органдарына кедергі келтіреді, сонымен бірге қоғамдық қауіпсіздікті қамтамасыз ету шараларының тиімділігін төмендетеді. Сондай-ақ, бұл біздің қоғамға тән емес және көпшілікті бұл ашық түрде алаңдатады», — деді Ермекбаев.
Фото: lifejournal.com
