Денсаулықтарына алаңдаған Новодолинка елдімекенінің тұрғындары дабыл қағуда
Жергілікті халықтың айтуынша, бұндай медициналық қалдықтар Новодолинка ауылының маңында осындай үш жерге жиналған екен. Қалдықтарды тастаған ұйым оларды өртемек болып, 500 метр көлемдегі жерді жаққан. Алайда, оған қарамастан, қолданылған шприц, ампула, бір реттік гинекологиялық айналар жойылмай қалған.
Малдарын далаға жайып жүрген жергілікті тұрғынның бірі Александр қалдықтарды видеоға түсіріп алған. Келесі күні де қар астында көміліп қалған зиянды заттарды біз де өз көзімізбен көріп қайттық.
«Бұл бірінші рет болып тұрған жағдай емес. Бұрын бұл жерден шамалы алыстау балшыққа апарып жағатын. Оны талай тұрғындар көрген. Жедел жәрдем көлігі келіп, артынан оттың жалыны мен түтіні шығып жататын. Оған халық көңіл бөлмейтін. Енді мынаусы масқара ғой. Дәл ауылдың іргесіне алып келіп жаққан», деген куәгер Александр түсірілген видеобейнені полицейлерге тапсырған.
Бір реттік гинекологиялық айналар қазір еш емханаларда қолданылмайтынын айтқан Қарағанды облыстық қоғамдық денсаулық қорғау департаментінің басшысы Ләззат СЕКЕРБАЕВА заңсыз тасталған қалдықтар түрлі ауруларға алып келетінін мойындады.
«Емханалар бір реттік айналарды пайдаланбайды. Олар арнайы зауыттарға өткізеді қалдықтарды. Аталған қалдықтардың тұрғындарға зияны тиюі мүмкін. Олар бекер алаңдап, дабыл қағып отырған жоқ. Гепатит А, Б, ВИЧ ауруы мен СПИД індеті таралуы әбден мүмкін. Сондықтан, қазір жауапты ұйымдар тексерістерін бастап кетті. Олар кінәлілерді анықтайды», деді облыстың Бас дәрігері.
Тексеріс жүріп жатқанда, қоғамдық денсаулық сақтау департаменті қызметкерлерінің қолдары жіпсіз байланулы. Тек күтілеріне тура келеді.
Мамандардың мәліметінше, медициналық қалдықтарды жоюға қаражат қарастырылмаған ұйымдарды тексеру керек. Себебі, мемлекеттік емханалар мен аурухалардың қалдықтары жоғарғы температурадағы арнайы пеште жойылады екен.
Фото автордікі.
