Егер қатаң шаралар қолданылмаса, радикализмнен жеңілдік деген сөз
Сабаққа хиджабпен кіргізбей қойғаны үшін балаларын мектепке жібермей қойған ата-анаға мұғалімдерді айдап салудың қажеті жоқ. Дінтанушы Кеңшілік ТЫШҚАН Rатеl.kz тілшісіне осылай деп мәлімдеді.
Ақтөбе мектептерінде хиджаб дауы басталғанда Кеңшілік Тышқан да аталған өңірде болыпты. Жекелеген ата-аналармен сөйлескенде қыздарының басынан орамалды шешуге көнеді. Бастары біріккенде айтылған әужге құлақ аспайды дейді ол.
Хиджаб дауы Ақтөбе облысында жылдың басында шықты. Білім және ғылым министрлігінің бірыңғай мектеп формасына сүйенген ұстаздар орамал таққан оқушыларды сабаққа кіргізбей қойған-ды. Жергілікті білім басқармасының мәліметінше қазір 170 оқушыны ата-аналар діни себептермен білім алуға жібермей отыр.
- Мұғалімдердің қолында ешқандай да заң жоқ. Оларды тыңдайтын ата-аналар да жоқ.Теологтардың да жұмысынан нәтиже шығады дегенге күмәнім бар. Тек күштік құрлымдар араласуы тиіс. Бірінші айыппұл одан кейін керек болса ата-ана құқығынан айыруға дейін бару керек. Сонда ғана мәселе шешіледі деп ойлаймын. Өйткені олар қазір көбейіп алды. Қатаң шаралар керек. Егер қатаң шаралар қабылданбаса радикализмнен жеңілдік деген сөз, - дейді дінтанушы Кеңшілік Тышқан.
Өткен аптада Ақтөбе қалалық соты Білім министрлігінің қаулысы орамал таққан оқушылардың конституциялық құқығын шектемеді деп үкім шығарған. Шенеуніктер жыл басынан бері 162 оқушы қыз хиджабын шешкендігін мәлімдеген. Алайда, бұл сандардың ресми ақпарат екенін ескерген жөн. Ақтөбе білім басқармасы қалған екі жүзге таяу ата-аналармен мұғалімдердің де келіссөз жүргізіп жатқандығын мәлімдеген.
Онсызда міндеттемесі көп мұғалімдерге бұндай жауапты істі жүктеу орынсыз дейді Кеңшілік Тышқан. Діни уәждерін айтып, исламнан терең түсінік беретін теологтардың өзі дәстүрлі бағыттағы емес ата-аналардың көзқарасын өзгерту үшін ұзақ уақытты сарп ететінін айтады.
Әзірге Ақтөбе облысында бұл мәселе толық шешілмей тұр. БАҚ-ры Ақтөбе облысындағы кейбір ата-аналардың балаларын қашықтықта оқытатын Ресейлік мектепке бергелі жатқандығын жазып жатыр. Хиджаб дауы 2017 жылдың қыркүйек айында Жаңаөзен қаласында да болған еді. 60 шақты оқушы мектепке кіргізілмей олардың ата-аналарыда конституциялық құқығымыз тапталды деп мәлімдеген.
Фото: azattyq.org.
