Министр Тамара Дүйсенованың айтуынша, кеншілермен келіссөздер жүргізіліп жатыр
Қарағанды облысында ереуілге шығып, бір тәуліктен бері жер астында қалып отырған 600-ден астам кеншімен келіссөздер жүргізіліп жатыр, деп хабарлады Sputnik.kz ҚР Еңбек және әлеуметтік қорғау министрі Тамара ДҮЙСЕНОВАҒА сілтеп.
Қарағанды облысы әкімдігінің бізге берген мәліметіне сәйкес, жердің астындағы шахтерлердің саны — 684. Сегіз шахтаның әрқайсысы өз өкілдерін жіберді. Қазір 32 белсенді жұмыс берушімен кездесіп, келіссөздер жүргізіп жатыр. Бүгін сағат тоғызда жұмыс беруші мен жұмыскерлер арасында келіссөздер басталды. Қарағанды облысы әкімшілігі, біздің еңбек инспекциямыз, басқа да құқық қорғау органдарының бәрі сонда. Қажетті мониторинг жасалып жатыр. Жұмыс беруші мен жұмыскерлер арасындағы келіссөздер аяқталғаннан кейін қандай келісімге келгені жөнінде қосымша ақпарат беретін боламыз", — деп хабарлады Дүйсенова журналистерге үкімет отырысынан кейін.
Министрдің айтуынша, кеншілердің негізгі талабы — еңбекақыны жүз пайызға дейін көтеру.
"Қазіргі уақытта "АрселорМитталдың" шахталарында істеп жатқан азаматтар алатын еңбекақының ең төменгі мөлшері — 208 мың теңге, ал жоғары мөлшері — 326 мың теңге. Бұдан бөлек, олар еңбекке жарамсыздық парағын жүз пайыз төлеу мәселесін талап етіп отыр. Сонымен қатар еңбекақыға байланысты тарифтер жөніндегі мәселелер бар. Зейнет жасын 50-ге дейін төмендету, шахтерлердің сауықтыру кешенін қайтару мәселелері қарастырылып жатыр", — деді министр.
Біздің Қарағандыдағы тілшіміздің хабарлауынша, шахтерлардың туыстары жақындарын ыстық тамақпен қамтамасыз етіп жатыр. Екі ауысым кеншілері жер астында қалып отыр. Ал, қалғаны шахтаға түспей, сыртта тұр. Олар кезекпен шахтаға түсіп, наразылық акциясын ауысып жалғастырайық, деп ұсыныс жасаған екен. Бірақ, жер астындағы кеншілер соңына дейін отырамыз деп шешіпті.
Естеріңізге сала кетейік, кеше, 11 желтоқсан күні таңертең түнгі ауысымнан кейін «Тентек», «Шахтинск», «Қазақстан» мен «Ленин» шахталарының кеншілері жер астынан шықпай қойған. Олардың негізгі талаптары: жалақыны 100 пайызға көбейтіп, еңбек жағдайын жақсартып және зейнетке 50 жаста шығару.
Алайда, компания басшылығы мен жұмыскерлердің мүддесін ортаға салатын «Қорғау» көмір кеншілері кәсіподағының арасындағы өткен келіссөзде еңбекақы кезеңмен 20- 30 пайызға ғана көтеріледі деп айтылды. Дегенмен, кеншілер жалақылары 100 пайызға көбеймесе наразылық акциясын жалғастыра бермек.
