Олар Бауыржан Байбектің жеке байлығына қатысты сұрақтарды да қойғысы келген
Әкімнің халыққа есеп беру жиынына шыққан қоғамдық белсенділер «тұтқынға» алыныпты
Бүгін сағат 10.00 де Алматы қаласының әкімі Бауыржан БАЙБЕК қала халқының алдына шықты. Дәстүрлі шара жылдағыдай Республика сарайында ұйымдастырылып, көпшілік сол жерге жиналды. Алайда, әкімнің қала халқына есеп беру жиынына барлық адам кіре алмады. Орынның жоқтығынан емес ыңғайсыз сұрақ қояды-ау дегендер бұл шарадан тыс қалып қойған.
Құқық қорғаушы Виктория ТЮЛЕНЕВА Facebook әлеуметтік желісінде «Көк жайлау» қоғамдық қозғалысының мүшелері де бұл кездесуге бармақшы болғанын жазады. Қоғамдық белсенділер жемқорлық, құрлыс нысандары мен жаппай ағаштардың шабылуы туралы сұрақтар қоймақ болған екен. Бірақ Абай ЕРЕКЕНОВ пен Андрей БУЗЫКИН сауалдарын қоймақ түгілі Республика сарайына жете алмаған.
Сағат таңғы 7.30 шамасында Абай Ерекеновтың домофонына белгісіз адамдар хабарласыпты. Өздерін жол полициясымыз деп таныстырғандар іздеудегі авто сіздің көлікке ұқсайды деп, Абайдың пәтеріне кірмекші болыпты. Таң атпастан жүрген бейсауыт «қонақтар» кіріп-шыққан көршілер арқылы подъездге еніп, ішке кіруге тағы да әрекеттенген. Күдігі тіптен ұлғайып кеткен қоғамдық белсенді есігін ашпаған.
Айтуынша, оның үйінің маңайын әлі де белгісіз адамдар торып жүр. Қазір ол адвокат шақыртып қойыпты. Бұл «таңғы шоу» әкімнің халыққа есеп беру жиынына жиналған Абай Ерекеновтың жолын бөгеу үшін жасалған. Бәлкім Республика сарайындағы «қойылымды» тек мемлекеттік қызметкерлер (мұғалімдер, дәрігерлер, әкімдік қызметкерлері, полиция) ғана көрулері керек болған шығар.
- Бұл әкімнің халық алдында есеп беру жиыны. Мен қала тұрғыны ретінде өз сауалымды қойғым келді.Сол жиынға барғым келді. Алматы әкімдігіндегі жемқорлық пен өзі және отбасы жайлы да сұрағым бар еді. Әкімнен аз уақыттың ішінде қалай байып алғанын сұрағым келген. «Алматы паркинг» ақылы автотұрақ және Көк жайлау хақында да сұрамақшы едім. Бірақ оған жеткізбеді. Әкімдік әкімге ұнамайтын сауалдар қойылмау үшін осындай қитұрқы әрекетке барды. Полиция қызметкерлерін өз мүделері үшін пайдаланып отыр, - дейді «Көк жайлау» қоғамдық қозғалысының мүшесі Абай Ерекенов.
Ал Абай Ерекеновпен салыстырғанда Андрей Бузыкин үйінен шығып үлгеріпті. Әйтседе, дәл бүгін тым қырағылық танытқан полиция Андрейді құжатын тексеру үшін тоқтатып, Медеу аудандық ІІБ-на алып кеткен.
- Ешқандай да себепсіз бізді полиция басқармасына алып келді. Біз Көк жайлаудағы құрлысқа қатысты сұрағымызды әкім Бауыржан Байбекке қою үшін үйден шыққанбыз. Әйеліміз екеуімізді үш сағат ұстады. Түсініктеме жаздық. Жуық арада Алматы қаласы ІІД-нің ішкі қауіпсіздік қызметіне шағым түсіреміз, - деді Андрей Бузыкин Ratel.kz тілшісіне.
Ақпараттық агенттіктердің хабарлауынша Бауыржан Байбектің есеп беру жиыны сәтімен басталған. Көлеңкелі экономикамен күрестің және кең ауқымда легализацияның жүргенін айтыпты. Қала басшысының айтуынша, «Көк жайлау» жобасында жеке меншік коттедждерді салу жоспарда жоқ екен.
Фото: Total.kz, Facebook.com.
