Бас прокуратура ОҚО құзырлы органдарының жоспарын екі рет бұзып тастады
Бас прокуратура тағы да Оңтүстік Қазақстан облысындағы резонанс тудырған қылмыстық іске араласуына тура келді. Әңгіме Ерехан СҮЛЕЙМЕНОВ хақында. Ол 2016 жылы адам қағып өлтіріп артынша амнистиамен бостандыққа шыққан белгілі шымкенттік байдың баласы Исмаил СҮЛЕЙМЕНОВТЫҢ (суретте) әкесі.
Сол оқиға қоғамда қызу талқыланған болатын. Жас жігіттің өліміне кінәлі адамның жазадан құтылып кетуіне жұртшылық наразылық білдірген еді.
Кейін Ratel.kz Исмаил Сүлейменовтың ауыр қылмыстарға қатысы бар деген күдікке ілігіп, бір жыл бойы қамауда жатқандығын анықтады.
Қылмыстық істегі материалдарға сүйенсек, Ерехан Сүлейменов бірнеше жыл бойы түркістандық кәсіпкер Сабыржан АТАЕВТАН ай сайын ірі көлемдегі қаражатын тартып алып отырған.
Сондай-ақ, тергеу болжамынша Ерехан бизнесменнен салық проблемасын шешу үшін бір миллион доллар алған-мыс. Ақыры шыдамның шегі таусылып, Атаев заң органдарына шағым түсірген.
Алғашында үлкен Сүлейменов ҚК-тің үш бабы бойынша айыпталған. Бопсалау, алаяқтық және пара беруге айдап салу. Алайда, тергеу амалдары басталғанда іс жүрмей қойды. ОҚО прокуратурасының нұсқауымен ІІД-нің тергеушісі Сүлейменов ісінде алаяқтық жасады деген бапты ғана қалдырды. Бұны айғақтың жоқтығымен түсіндірді.
Бұдан кейін кәсіпкер Сабыржан Атаевтың заңгерлері дабыл қағып, жоғарыға шағым түсірді. Адвокат Евгений ЯВОРСКИЙДЫҢ еңбегі еш кетпей Бас прокуратура бұл даулы іске араласты. Нәтижесінде Ерехан Сүйлейменовке қайтадан үш бірдей айып тағылды.
Облыста Бас прокуратураның тапсырмасы бірден орындалды. Бірақ та күдіктінің қорғаушылары «шайқассыз» берілмеуге бел байлапты. Ол тарап прокурорлардың үстінен облыстық сотқа шағым түсірген.
Енді кәсіпкер Атаевтың қорғаушылары жергілікті сот Сүлейменовтың пайдасына үкім шығарама деп уайымдайды. Сот отырысы жуық арада өтеді. Айтпақшы былтыр қыркүйек айында «шымкенттік мажордың» ісі Бас прокуратураның араласуымен қайта тергеуге жіберілген болатын. Кісі басып өлтіру оқиғасы әкелі-балалы Сүлейменовтарды бүкіл елге танымал етті.
Бас прокуратураның ОҚО-сы құзырлы органдары жұмысына екі рет араласуы олардың жұмысындағы кәсіби деңгейге күдік тудырған сияқты. Бірер күн бұрын Бас прокуратураның тапсырмасымен ОҚО прокуроның орынбасары Әбіл ҚОЖАХМЕТОВ қызметінен босады.
