Министр ПМХЗ жөндеуі бітпесе ҚМГ басшылығын қызметтен алуға ниетті
Энергетика министрі Қанат БОЗЫМБАЕВ 1 қараша, сәрсенбіде «ҚазМұнайГаз» ҰК» АҚ-ның мұнайды тасымалдау, қайта өңдеу және маркетинг бойынша атқарушы вице-президентінің міндетін атқарушы Данияр ТИЕСОВТІҢ және «ПМХЗ» ЖШС бас директоры Шухрат ДАНБАЙДЫҢ қатысуымен Павлодар мұнай-химия зауытын жаңғырту барысы мәселесі бойынша жұмыс кеңесін өткізд, деп хабарлайды компания баспасөз қызметі.
«ПМХЗ» ЖШС-да жаңғыртуды аяқтау және жоғары октанды бензин мен дизель отынын шығару үшін қажетті қондырғыларды іске қосу мерзімдері бойынша артта қалушылық белгілі болды.
Жаңғыртуды аяқтау мерзімі «ПМХЗ» ЖШС үшін 26 қазан, ал Атырау мұнай өңдеу зауыты үшін 16 қыркүйек белгіленген болатын. Алайда «ҚазМұнайГаз» ҰК» АҚ мерзімдерді ағымдағы жылдың желтоқсан айының бірінші жартысына ауыстырды», - делінген таратылған хабарламада.
Баспасөз қызметінің хабарлауынша, Д. Тиесов пен Ш. Данбайдың ақпаратын тыңдап, министр жақын арада жоғары октанды бензинмен және дизель отынымен ішкі нарықты қамтамасыз ету бойынша шұғыл шаралар қабылдауды тапсырды.
Атап айтқанда, жекелеген қондырғыларда ақаулардың туындауы туралы ұсынылған деректердің негізінде Қ. Бозымбаев мұнай өнімдерін өндіру қондырғыларын орнату мерзімдері орындалмауы мүмкін екендігін ескертті.
Кеңес қорытындылары бойынша министр 8 қарашаға дейінгі мерзімде жоғары октанды бензинді шығару қондырғыларын және қысқа мерзімде дизель отынын шығару қондырғыларын іске қосу қажет екендігін атап өтті.
«Бұл ретте, «ПМХЗ» ЖШС-ны жаңғыртуды аяқтаудың белгіленген мерзімдері сақталмаған жағдайда, министр топ-менеджерлерді атқаратын қызметтерінен босату туралы ұсыныс енгізетін болады. Павлодар және Атырау МӨЗ-деріне министр объектілерді жаңғыртуды созу тәуекелдерін анықтау үшін министрліктің комиссиясын жіберуді тапсырды», - деп жазады баспасөз қызметі.
Естеріңізге сала кетейік, 2 қазан күні Павлодар облысының әкімі Болат БАҚАУОВ Астанада ОКҚ баспасөз маслихатында Павлодар мұнай химия зауытын жаңғырту жұмыстары 1 қарашада аяқталады деп ауыз толтырып айтқан болатын. Ол 26 қазан күні зауыт жөндеуден өткеннен кейін сынақ жұмыстарын бастап кетіп және қуаттылығы 1 миллион тоннаға артады деген.
Ал кейін, 11 қазан күні президент энергетика министрі Қанат Бозымбаевқа сөгіс жариялаған болатын.
«Отын жетіспеушілігінен құтылу үшін бағаға мемлекеттік бақылау орнатуды алып тастау ұсынылды. Алайда нарықта сол баяғы жетіспеушілік орын алып жатыр. Осыған байланысты үкіметтің ұсынысымен мен сізге сөгіс жарияладым. Бұл деген қызметтен босатумен бірдей шара», – деген еді НАЗАРБАЕВ.
Кейін журналисттер министрден мына жағдайға байланысты отставкаға өз еркіңізбен кету ойыңызда жоқ па деген сұрақ қойды.
Бозымбаев: «Мен осы үкіметтің министрімін. Менің тағдырым президенттің қолында Елбасы не десе, сол болады. Сондықтан үнжырғаны түсіруге болмас. Бар мәселені шешуіміз қажет. Осындай проблема үшін тезірек бұқарадан кешірім сұрауымыз тиіс. Бірақ та оған өзінің объективті себептері болған», деп жауап берді.
Ал президент сөгісі қызметте босаумен пара-пар деседе, Бозымбаев әлі өз орнында.
Фото: liter.kz.
