Қарағандылық имам Ризабек Батталұлы тағы бір "пәтуа" шығарды
Осыдан біраз уақыт бұрын Ризабек БАТТАЛҰЛЫ шариғат бойынша әйелді қалай дұрыс ұру керектігін жұртқа түсіндіріп бүкіл елге әйгілі болған еді. Оның айтуынша, әйелдің денесін жарақаттамай, бір жерін сындырып алмай ұруға болады екен. Оған шариғатта рұқсат етілген дейді.
Енді Facebook желісінде «Терең мағыналы сөздер» атты топта имамның жаңа видеожазбасы жарияланыпты. Бұл жолы дін қызметкері әйелдерін еркелетіп «жаным» деп жүрген азаматтарға өзінің көзқарасын білдіріпті.
«Қазақ айтады "Қатын тілін алған, қаран қалады" деп. Қазақ ешқашан қатынын "жаным" демеген. Қазақ баласын "жаным" деген, қазақ анасын "жаным" деген. Құранның ескерткен аяты болып тұрған бабаларымыздың заманында еркектік сипат деген болған. Ол кезде жезөкшелік болмаған, жетімдер болмаған», - дейді имам.
Жазбаны көргендер әрқилы пікір қалдырыпты. Оның ішінде имам сөзін қолдағандар мен қоса, қарсы пікір айтқандар да бар.
«Сонда жезөкше-жетім көбейгені «жаным» деп айтқан сөздің кесірінен болып тұр ма? Менің анам əкеме қатын болады. Сонда мен оны тыңдамаймын ба қараң қаламын деп? Аңқау елге арамза молда ғой мынау», - деп жазыпты Амантай САТАЕВ атты желі пайдаланушысы.
Ал, Қалжан БАЙШЫЛЫҚОВА: «Әкелерімізден естімедік апамды жаным дегенін, ал ұлымыз алдында анасы тұрғанда келінді жаным дейді ғой. Дұрыс молданың айтқаны», - деп қарсы пікір білдірген.
