Омбы қаласының мэрі болуға үміткер Дмитрий Перевальский өз қаласындағы демографиялық мәселені шешу үшін Қазақстаннан ер-азаматтар әкелуді ұсынды
Омбы қаласының мэрі болуға үміткер Дмитрий ПЕРЕВАЛЬСКИЙ осы қаладағы туу көрсеткішін арттырудың жолын ұсынды. Ол Қазақстаннан ер-азаматтарды әкеліп, омбылық қыз-келіншектермен таныстыруға жағдай жасау керек дейді. Бұл туралы «СуперОмск» сайты хабарлады. Перевальский қазақстандық еркектер Омбы қаласындағы туу көрсеткішіне мықты ықпал жасайтынына нық сенімді.
«Жастарға отбасын қалай құру жолын үйрету керек. Олар отбасын қалай дұрыс құруды білмейді. Солтүстік Қазақстанда Омбыға көшкісі келетін ер-азаматтар көп. Осыған орай, шенеуніктер арнайы курстар, жастар лагері мен би кештерін ұйымдастырып, біздің қыздарды қазақ жігіттерімен таныстыру қажет», – дейді ол.
Қала мэрі болуға үміткер Перевальский омбылық қыз-келіншектердің теңін таппай жалғызсырап жүргеніне жаны ауыратынын жасырмайды. Өз қаласында жібі түзу еркектердің аздығын алға тартқан ол омбылық ерлердің біразы түрмеде, біразы вахталық жұмыста, ал қалғандары алқаштар, нашақорлар және арамтамақтар деп ағынан жарылды.
Қазақстандық әлеуметтік желілерде Перевальскийдің бұл ұсынысы қызу талқыға түсті. «Ресейлік шенеунік айтты екен деп, жігіттерімізді Омбыға жібере алмаймыз» деп тулаған келіншектерге басу айтып, сабырға шақырған жігіттер жағы: «Көршімізге көмек бергенде тұрған ештеңе жоқ қой» десті.
Кейбір қыз-келіншектерге Перевальскийдің пайымы ұнаса керек, «мейлі, қаласының туу көрсеткішін арттыруға жігіттерімізді жіберейік. Бірақ тегін емес, әрі төленетін ақысы да жақсы болсын» деген пікір білдіріпті.
Алайда Омбыға қазақ жігіттерін жіберу туралы мәселеге түбегейлі қарсы қыз-жігіттер:«Қыздарымыз қытайдың, ер-азаматтарымыз орыстың жетегіне кетсе, ертеңіміз не болмақ? Омбылықтар өздерінің демографиялық проблемасын өздері шешіп алсын» деп жазды.
