Павлодар облысында қыздардың жүрегін жаралап, алаяқтық жасаған жігіт іздеуде
Павлодар полициясы екібастұздық Салық ҚАҒБАТОЛЛА есімді азаматқа іздеу салады. 25 жастағы жігіт әлеуметтік желілер арқылы қылмыс жасаған. Ол желілерде жас қыздармен танысып, жүректерін жаулап алған.
2017 жылдың желтоқсан айында бір қызбен виртуалды түрде танысып, артынша үйіне қонаққа барған. Әңгіме барысында өзінің анасына қатысты ойдан шығарылған қайғылы оқиғаны баяндап беріп, бойжеткеннің аяныш сезімдерін оятыпты. Қолайлы сәт туғанда «әртіс» жігіт қыздың ұялы телефоны мен ақшасын ұрлап кетіпті. Бірақ, алаяқ мұнымен шектелмеген.
Келесі құрбанымен де дәл солай желі арқылы танысыпты. Тіпті, бойжеткенге «тұрмысқа шықшы» деп ұсыныс жасаған. Бақыттан басы айналған жас қыз бірден келісімін беріпті. Бұдан соң айлакер қалыңдығына той жасау үшін ақша керек екенін айтып, несие алуға үгіттеген. Ақыры дегеніне жеткен «күйеу жігіт» ақшаны қалтасына басап, ізін суытқан. Қазір осы дәйекке қатысты «Ұрлық» және «Алаяқтық» баптары бойынша қылмыстық іс қозғалған. Тәртіп сақшылары көпшілікті 25 жастағы Салық Қағбатолланың алдауына түсіп қалмауға шақырады.
- Егер сізге күдіктінің тұрғылықты жері белгілі болса, немесе оның іс-әрекетінен біреу жапа шексе, Екібастұз қаласы ІІБ кезекші бөлімінің 102, 8 (7187) 75-06-06 телефондарына қоңырау шалыңыз немесе whatsapp-тың мына +77077004056 хабарлама жазыңыз, - делінген Павлодар облысы ІІД баспасөз хабарламасында.
Пысықайдың сондай-ақ «Каба» деген лақап атқа ие екенін айта кетейік. Егер ол ұсталынған жағдайда, 5 жылға дейін бас бостандығынан айырылуы мүмкін.
Фото әлеуметтік желілерлен алынды.
