ҚР Мемлекеттік қызмет істері және сыбайлас жемқорлыққа қарсы іс-қимыл Агенттігінің дерегінше өнер адамдарының қылмысы көбейіп барады
Актерлар өнер мен мәдениеттегі жемқорлыққа қарсы. Маңғыстау облысына осындай бастама аясында Ғазиза ЖҰБАНОВА атындағы Ақтөбе облыстық филормония құрамындағы «Екі езу» театры гастрольдік сапарға шықпақ. Бұл сапар бес күнге жалғасады.
Шара ҚР Мемлекеттік қызмет істері және сыбайлас жемқорлыққа қарсы іс-қимыл Агенттігінің Маңғыстау облысы бойынша департаментінің қолдауымен болады. Концерт: «Өнер мен мәдениетте жемқорлыққа орын жоқ» деп аталады.
«Екі езу» сатира театрының көркемдік жетекшісі Нұрлыбек ЖҰБАТҚАННЫҢ айтуынша, бұндай идея белгілі актерлар Тұңғышбай ЖАМАНҚҰЛОВ пен Ерлан БІЛӘЛ істі болғанан кейін келмеген.
2012 жылы Ақтөбедегі Т. АХТАНОВ атындағы театр есепшісі 1,5 миллион теңгені бейберекет жұмсап, сол кездегі басшы Жеңісбек ҚАЛҚАБЕКОВ қызметтен кеткенде осы тақырып ойландырды дейді.
- Облыстық театр басшысы қызметінен кеткесін,директор болып мен тағайындалдым. Сол кезде осы мәселе мені толғандырды. Ол кезде де өнер мен мәдениет саласындағы жемқорлық жайлы еститінбіз. Бірақ олар соңғы оқиғалардай қоғамдық сілкініс тудырмады. 2013 жылы жемқорлықтың өнер адамдарының ауылына соғатынын сездім. Алғаш «Командос» деген комедия жазып, оны сахналадым, - дейді Нұрлыбек Жұбатқан.
Театрдың концерттік бағдарламасы бір жарым сағаттық екен. Барлық интермедиялар жемқорлық тақырыбына арналған.Осы тақырыпта музыкалық шығармаларда айтылады. Актер соңғы кездері өнер саласында жемқорлықтың қанат жаюы қалыпты дүниеге айналып кеткені жанды ауыртады. Біз өз бағдарламамыз арқылы сол қылмыстардың алдын алсақ дейді.
- Тұңғышбай ағаның өнеріне тәнті болып өстік. Біздің талай кештерімізге келген. Ерланды да жақсы білеміз. Бір өнердің пұшпағын илеп жүрміз ғой. Олардың басындағы жағдай жүректі ауыртты. Бұл қиын жағдай. Көптеген адамдар өнер иелеріне еліктейді ғой. Мен өз басым 20 жыл театр басшылығында болдым. Негізі өнер адамына шаруашылық пен өнерді қатар алып жүру қиын. Шығармашылық адамы тек өнермен айналысқаны жөн ғой, - дейді «Екі езу» театрының көркемдік жетекшісі.
Жалпы, өнер және мәдениет саласында жемқорлық фактілері жыл сайын өсіп келе жатыр. 2016 жылы бұл саладағы 12 лауазымдық қызметтегі адам сотталса, 2017 жылдың бірінші тоқсанында алты адам істі болған. Көбіне бюджет қаражатын талан-таражға салу фактілері кездеседі екен.
Бұндай ақпаратты ҚР мемлекеттік қызмет істері және сыбайлас жемқорлыққа қарсы іс-қимыл агенттігі төрағасының орынбасары Алик ШПЕКБАЕВ таратқан болатын.
Фото: Facebook.com.
