Журналист аса ауыр қылмыс жасады деген күдікке ілінді
Шымкент қаласында «Темір қазық ой» республикалық қоғамдық-саяси газеттің бас редакторы Анаркүл СҮЛЕЕВА қамауға алынды. Журналист адам ұрлау, бопсалау және бұзақылық сияқты ауыр қылмыстар бойынша күдікке ілінді.
Тергеу мәліметтеріне сәйкес, қылмыс 2016 жылы жасалған. 41 жастағы әйел және оның үш сыбайласы ер адамға ішімдік беріп мас қылған, оны жалдамалы пәтерде мәжбүрлеп ұстап, жалаңаш күйінде видеога түсірген. Кейін бұл жазба желіге тарап кеткен.
Біздің ақпарат бойынша, жәбірленуші жергілікті ауыл мешітінің имамы болуға үміткер болған екен. Бұл оқиғадан кейін, көздеген қызметіне қол жеткізе алмаған. Жәбірленуші құқық қорғау органдарына шағымданғаннан кейін, полиция қылмыскерлерді тұтқындаған.
Айта кетеік, Сүлеева «Темір қазық ой» газетінің бас редакторы ғана болып қоймай, оның бірден бір иесі болып табылады. Басылымда сын мақалалар жиі жарияланып тұратын. 
Сондай-ақ, Анаркүл Сулеева Оңтүстік Қазақстан облыс әкімшілігінен бірнеше рет марапат алғаны белгілі.
Айтпақшы, бұндай оқиға Шымкент үшін жаңалық емес. Еске сала кетейік, 2017 жылдың желтоқсан айында қалада шығатын «Қоғамдық бақылау» газетінің бас редакторы Ғани ӨМІРӘЛИЕВ алаяқтық үшін сотталған болатын. Ол «билік өкiлiнiң немесе мемлекеттiк лауазым атағын өз бетiнше иемденіп алу» деген бап бойынша кінәлі болып танылып, 5 жылға бас бостандығынан айырылған еді. Өзін алаяқтық жолмен салық мекемесінің қызметкерімін деп таныстырған Өмірәлиев кәсіпкерлерге қамқорлық жасаймын деп, жыл бойы ақша алып отырған.
Одан бөлек, өткен жылдың желтоқсанында Шымкентте қылмыстық іске байланысты жалған мәлімет берген үшін қоғамдық белсендісі Сүйін АБУЛДАЕВ ұсталған болатын. Қазіргі уақытта ол сот басталғанша кепілмен босатылды.
