Қазақ мәдениетінің дамымауына хақы жоқ
Дүйсенбі күні мәжілістегі үкімет сағатында мәдениет және спорт министрі «Рухани жаңғыру» бағдарламасының қалай жүзеге асып жатқандығын айтып берді. Министр мырза мәдениет саласы қызметкерлерінің әлеуметтік жағдайын да баян етті. Ведомство басшысының сөзінше, аз еңбекақы мәдениет майталмандарының рухани жаңғыруына кедергі келтірмейді екен.
"Шынында, еңбекақылары төмен. Аш адам шығармашылық тұрғыдан әлдеқайда табысты келеді деп саналады. Көпшілік Бетховенді, Моцартты мысалға келтіріп жатады.Олар жоқшылықта өмір сүрді, бірақ шедевр дүниелерді жазды. Бәлкім, қаржыгерлердің айтқаны дұрыс шығар және қаржыландырудың аз болғанына қарамастан біздің талантты азаматтарымыз халықаралық деңгейге шығып жатыр",- деді министр Арыстанбек МҰХАМЕДИҰЛЫ.
Қарапайым кітапханашы, мұражай және мәдениет қызметкерлерінің Бетоховен сынды ән жаза алмайтынын ескерді ме, министр мырза оларға қаржылық қолдаудың керектігін атап өтті.
Қаржы министрлігінің мәліметіне сүйенсек 2005 пен 2011 жылдар аралығында мәдениет саласы мамандарының айлығы бес мәрте көтерілген. Алайда, олар бәрібір еңбекақысы ең төмен маман иелеріне жатады. Мәжіліс төрағасының орынбасары Гүлмира ИСИМБАЕВА айтуынша мәдениет саласындағы адамдардың жалақысы 38 мың теңгеден басталады.
