Ақын Балтабек Нұрғалиев Сара Назарбаеваның бүгінгі туған күніне өлең арнады
Жас ақын Балтабек НҰРҒАЛИЕВ Қазақстанның бірінші ханымы Сара НАЗАРБАЕВАҒА арнап өлең жазды. Бүгін Сара Алпысқызының туған күні. Соған орай ақын жырдан шашу шашып, Facebook.com әлеуметтік желісіндегі жеке парақшасына өз туындысын жариялаған.
Жиырма тоғыз шумақтан тұратын бұл шығарманы көлеміне қарай толғауға да жатқызуға болады. Бастысы ода жанры екені даусыз.
Керемет пайымыңыз – дара пайым,
Керемет пайымыңыз – дана пайым.
Туған күн құтты болсын деймін Сізге,
Анасы бар қазақтың – Сара Апайым!
Өлең осылай басталып Сара Алпысқызының жас кезінде инабатты келін болғандығыда айтылады.
Ұғынып Әлжан Әже өсиетін,
Ұғынып Әбіш Баба өсиетін.
Келін боп, көргенділік көрсеттіңіз,
Сіңіріп Тектіліктің қасиетін!!!
Сонымен қатар, Сара Алпысқызының «Бөбек қорындағы» жұмысыда жырға арқау болған.
Апатай, жүзіңізде – иманыңыз,
Көбіне кемел өмір сыйладыңыз.
Жазылсын сауап болып мәңгілікке,
Көз жасын жетімдердің тыйғаныңыз.
Автор енді бір шумақтарында тілектерін де білдіріп, өлеңіндегі алғашқы жолдағы ойын түрленте түседі.
Болмайды ешкімнің де бір таласы,
Шынайы шабытымның шырқамасы.
Ардақты, асыл тұлға – Сара Апайым –
ӨЗІҢІЗ – ЕЛ АНАСЫ, ҰЛТ АНАСЫ!
Балтабек Нұрғалиев осындай арнау өлеңдерімен әлеуметтік желіде танылып келе жатыр. Бұған дейін «Үрімі үзбесінші үстемдігін», (Назарбаевтар әулетіне арнау) «Әніндей Әбік әке әділеттің», «Немересі әженің Әлжандайын», «Дана қызы қазақтың-Дариғасы» атты туындыларын жариялаған. Сонымен қатар, ол Қазақстан монархиялық басқару формасына көшу керек деген ұстанымымен белгілі. Бір сұхбатында «Бізді Назарбаевтар династиясы ғана билеу керек» деген еді.
Айтпақшы, бүгінгі туған күн иесі 77-жасқа толып отыр. Сара Алпысқызы «Бөбек» қайрымдылық қорының негізін салушы. Достық, Барыс ордендерінің иегері. Үш қыздан сегіз немере сүйген әже.
Фото: liter.kz.
