«Жұлдызды» инстаграм жаңалықтары
@ aikynТыңдармандар арасында «Кешью» тобының әншісі Жұлдыз ӨМІРҒАЛИДЫ тоқалдыққа алды деп сөзге қалған Айқын ТӨЛЕПБЕРГЕН шенеуніктерді сынға алды. Расында жуырда әлеуметтік желіде кеншілер туралы пікір айтқан біраз шенеуніктер жұрттың шамына тиген еді. «Мұртты депутатты тыңдаңыз» деген атаумен тараған бейне жазбада ел тани бермейтін депутат - Мұрат Теміржанов түсініксіз пікір айтып, көрермен арасында күлкіге қалған. Әнші жігіт осыны тілге тиек еткісі келді ме, парақшасына сөйлеп отырған сәтіндегі фото суретін қойып, астына мынадай жазба қалдырыпты.
«Бірақ дегенмен оның да салдарынан, әлеуметтік тұрғыдан қарағанда, басқа интеграциялық мәселелер туындауы мүмкін» - деп, шенеуніктер сияқты «ни о чем» сөйлеп тұрған сияқтымын. Былайғы уақытта шенеуніктер сағаттап сөйлеп жатады, бірақ ештеңе айтпауы мүмкін» деген. Оқырмандары арасында Айқынның бұл қылығына мін тағушылар да табыла кеткен. Мысалы, asel.zholdasova есімді оқырман: «Шенеуніктерді жауапсыз деп сынға алғанша, бірінші отбасыңызға жауапты қарасаңызшы. Өмірдің дәл жол ортасына келгенде әйеліңізді сатып кеттіңіз...» - деп Айқынның өзін айыптаған.
@m_besbaev Қарағанды шахтерлерінің бас көтеріп, жер астынан шықпау қоюы өнер адамдарын да алаңдатпай қоймады. Бұған сахна саңлақтарының әлеуметтік желілерде кеншілермен бірге екендігі жөніндегі жазбалары дәлел. Мәселен, қашанда ел ішіндегі мәселелерді елеңсіз қалдырмайтын Мейрамбек БЕСПАЕВ: «Тезірек шешілсе екен деп тілеймін. Жердің астында да, үстінде де тыныштық болмай барады» - деп жанайқайын бірінші болып жеткізді.
nurzhan_kermenbayev Сондай-ақ, жас әнші Нұржан КЕРМЕНБАЕВ та бұл мәселеге өз үнін қосты. «Менің марқұм әкем де кенші болған еді. Жұмыстарының оңай еместігін мен де, анам да, жақын ағайын-туысқандарым да жақсы біледі. Кеншілердің айлығы мәз еместігін біз білеміз. Сондықтан мен де екі қолымды көтеріп, шахтерларды қолдаймын! Таза еңбегі мен, қара термен табатын жалақыларын көтеруін сұраймыз, құрметті Лакшми Миттал мырза!»- деп, жазды ол жеке парақшасында.
@ saken_maigaziyev МұзАРТ тобының әншісі Сәкен Майғазиев та қарап қалмады. «Сізге де, бізге де жылу силап жүрген арыстай азаматтарға Алла пана болғай. Біз сіздермен біргеміз! «Жау жағадан алғанда, бөрі етектеннің» кебін киіп, отқа май құйғың да келмейді... Ебін тауып, екі асап түйені түгімен жұтып жүргендер де Алла алдында есеп береді. Алла бәрін білуші» деп жазды әнші өз парақшасында.
@smittykz Ал, «SMITTY» тобының солисі, рэп-әнші Алмас ҚҰМАРБЕК өз ойын әдетінше өлең жолдарымен жеткізген. Бір кездері «Мен қазақпын!» деп ұрандап ән салып, биліктегі ағалардың қылығын әшкерелеген жігіттердің бірі жоғары жақты тағы да нұқыды.
«Миттал сотқа беріпті, жаппай түгел кеншіні,
Қара индусқа бермейміз өзіміздің еншіні.
Жығылмасын жігіттер, үзілмесін үміттер...
Қашан мойын бұрады, биліктегі көкелер?!» - деген өлең арнапты рэп жанрының әншісі.
@anuar_nurpeisov Жас актер Әнуар НҰРПЕЙІСОВ сылдыр сөзден көрі, көпшілікті мәселені шешуге шақырды. «...Кез келген митингтер мен толқулар және аштық жариялау қоғамда белгілі бір мәселеге мойын бұрғызу мақсатында ұйымдастырылады. Халық барлығын бақылап отырса монополист компания мен үкімет мәселені байқап шешуге тырысады. Бұл жерде жариялылық - әсер етудің мықты құралы болып табылады. Өздеріңіздің парақшаларыңыздағы жазбаға @arselormittal_temirtau компаниясының аккаунтын белгілеп, мыңдаған адамның жер астында ауыр жұмысқа жегілген аға- бауырларымызды қолдайтынын көрсетейік. Мен шахтерлердің талабын бейбіт жолмен шешілгенін қалаймын. Компания мен үкімет бұл сауалды өзара келісімге келе отырып, оңтайлы шешім шығаратынынан үміттенемін» - деді ол.
@ mussilim Әріптестері әлеуметтік желі арқылы кеншілерге араша түсіп жатқанда, қыздардың жүрегін жаулаған актер Тәуекел МҮСІЛІМ ақпарат құралдарынан керісінше, көңілі қалғанын көрсетті. «Біздің ақпарат порталдарын сирек парақтауға тура келеді. Онда күлкі де, жылау да бар. Адамдар мәңгі жасамайтынын ұмытса керек. Бәрінің де соңы мен сұрауы бар» - деп қатуланған.
