Раиса Жәкішеваның Назарбаевқа ашық хаты желіде жарияланды
Осыдан 8 жыл бұрын сотталған “ҚазАтомПром” АҚ бұрынғы басшысы МҰХТАР ЖӘКІШЕВТІҢ денсаулығы күрт нашарлаған. Осыған орай анасы Раиса ЖӘКІШЕВА Нұрсұлтан Назарбаевқа ұлын кешіруді сұрап, ашық хат жолдаған. Бұл туралы құқыққорғаушы және қоғам белсендісі Бақытжан ТӨРЕГОЖИНА өзінің Facebook парақшасында хабарлады.
Құқыққорғаушының айтуынша, Жәкішев күніне 30 дәрі қабылдайды.
«Қазір ол Қарағанды облысы Долинка ауылындағы АК-159/6 мекемесінің санитарлық бөлімшесінде жатыр. Оның құбылмалы ауа райынан әсерінен басы қатты ауырады. Қысымы жоғары болғандықтын жағдайы күннен-күнге нашарлауда. Сондықтан күніне бірнеше дәрі ішуіне тура келеді», – деп жазды Төреғожина.
Жәкішевтің 79 жастағы анасы 2017 жылдың қарашасында президентке өтініш жасаған. Онда әйел қатты науқастанып қалған ұлының жағдайын айтып, бостандыққа шығаруын сұраған.
Төреғожина да парақшасында желіде қолдау сұрап, ашық хат астына қолдарын қоюды өтінген. Қазіргі таңда бұл үндеуді 500 жуық адам қолдаған.
Еске сала кетейік, Мұхтар Жәкішев 2009 жылы ірі уран кен орындарындағы мемлекеттік акцияларды сатқаны үшін айыпталған еді. Ол 2010 жылы наурызда пара алғаны үшін кінәлі деп танылды, 14 жылға бас бостандығынан айырылып, қатаң тәртіптегі түрмеге қамалды.
