Медициналық сақтандыру жүйесі қорына жұрт не үшін ақша төлеп жатыр
Жыл басынан бері міндетті әлеуметтік медициналық сақтандыру жүйесі бойынша азаматтарға дәрігерлік көмек көрсетіле бастауға тиіс еді. Және көрсетілетін дәрігерлік қызметтің сапасы жақсарады деп Денсаулық сақтау министрлігі халықты сендірген болатын.
Медициналық сақтандыру қорының баспасөз қызметі таратқан ақпаратта 2018 жылдың 31 қаңтарына дейін қорға түскен ақша сомасы – 38 млрд теңгені құраған. Яғни, бұл қазақстандықтардың сапалы медициналық көмек көрсетуге төлеген ақшасы. Алайда дәрігерлік қызмет көрсету сапасы жақсарудың орнына былық болып жатқан сыңайлы.
Өткен аптада «Болашақ» республикалық жастар қозғалысының төрағасы Дәурен БАБАМҰРАТОВ өзінің Facebook парақшасында:
«МӘМС қорына былтырдан бері ай сайын, уақытылы ақша төлеп отырмын. Құлағым ауырып, осыған дейін тіркелген ДостарМед емханасына барып едім, ол жердегілер мен қабылдаудан бас тартты. Себебі мен 2018 жылғы қаңтар айының 1-інен бастап АМД емханасында тіркеуде екенмін. Бұл емханаға мені кім тіркеген, түсінсем, бұйырмасын!? Содан АМД емханасына хабарластым. Сөйтсем, бұл емхана шаш өсірумен айналысады екен! ДостарМед емханасындағылар бір ғана мен емес, жүздеген адамның осындай жағдайға тап болғанын айтады. Ауырып, бұрынғы тіркелген емханасына барған адам, өзінің қазір мүлде басқа жақта тіркеуде екенін біледі. Тіпті біреу Семей қаласындағы емханада тіркеуде екенін таяуда ғана білген. Бұл қалай? Медсақтандыру да кешегі жекеменшік зейнетақы қоры сияқты жұрттың ақшасын жинап алып, кейін банкрот болатын қордың бірі ме? Екі жерден жалақы алам, сол екі жалақымнан МӘМС-ке ақша төлеп отырмын. Сонда мен ақшаны шаш өсіруге төлеп отырмын ба?» деп жазды.
Ал алматылық Ділмахамбет МЫСЫРҰЛЫ: «Мен жұмыссызбын. Ауырып, емханаға бардым. Алайда маған ешқандай дәрігерлік көмек көрсетілмейді екен. Статусымды анықтау керек екенмін. Ал статусты анықтау үшін белгілі бір жерде тіркеуде тұруым керек. Өзімде баспана болмаса, тіркеу қайдан болсын? Уақытша тіркеуге тұру үшін, алдымен тұрақты тіркеуің болуы керек. Сонда мен сияқтылар қайтпек? Ауырып құлаған жерінде медициналық көмек көрсетілмей, арам қатпақ па?» - деп реніш білдірді.
Елімізде статусы нақты анықталмаған 3 миллионға жуық адам бар деп Еңбек және халықты әлеуметтік қорғау министрлігі мәлімдеген еді. Олай болса, осы миллиондаған адамның бәрі дәрігерлік көмектен қағыла ма?
Денсаулық сақтау министрі Елжан БІРТАНОВТЫҢ «МӘМС жүйесі біздегі медициналық қызмет көрсетудің сапасын көтеруге ықпал етеді» деген пікіріне Оңтүстік Қазақстан облысының тұрғыны Әуелхан ШОНЖАН: «МӘМС жүйесі халықтың қалтасын қағудың кезекті әдісі деп ойлаймын. Осыған дейін бюджеттік емханадағы жағдай қандай болса, қазір де солай, еш өзгеріс жоқ. Былтырдан бері ай сайын ақша аударып отырсақ та, сапалы медициналық қызмет үшін өз қалтамыздан бәрібір қосымша ақша төлеуге мәжбүрміз. Өйткені бюджеттік емханадан гөрі ақылы емдеу орталығының қызметі дұрысырақ. Медициналық қызметтің сапасы артады деп жұрттан миллиардтап ақша жинап отырған МӘМС қорының ертеңіне сенбеймін. Алдымен медицина саласын сауатсыз дәрігерден тазартпайынша, сапалы медициналық көмек туралы айтудың өзі ұят», - дейді.
Фото: rs.img.com.ua.
