Үш жасар немересін пышақтап тастаған қылмыскер 19 жылын темір тордың ар жағында өткізеді
Қарағанды облысы, Шет ауданының орталығы Ақсу-Аюлы кентінде жантүршіктірер сот процессі аяқталды. Аудандық соттың судьясы Бекзат ШАЛҒЫМБАЕВ өз немересін пышақтап өлтірген азаматқа қатысты сот үкімін шығарды.
Қарағанды облысы, Шет ауданына қарасты Ағадыр ауылының 1978 жылғы тұрғыны Виталий ТОГОВСКИЙ 2017 жылдың 6-қазанында 3-жасар немересін өлтірген. Қылмыскер арақ ішіп алып жазықсыз баланы пышақтапты. Сотта Тоговский өз қылмысын толық мойындады.
«Оқиға болар алдында үш күн бұрын тісім ауырды. Тістің ауруын басатын дәріні көршімнен алып іштім. Артынан оның барлығы арақпен араласып кетті. Бала менен ананы-мынаны сұрап мазамды алған соң шыдамай, бірнеше жерден пышақтап тастаппын. Алайда, дәл қалай болғынын білмеймін. Ұйқыдан тұрсам, немеремнің қансырап жатқанын көріп, қашып кеттім. Көрші тұрған анама барып, бар болған жайды айтып бердім»,- деді 39 жастағы Виталий Тоговский.
Полиция қызметкерлері қылмыскерді бірден ұстап, 6 қазаннан бастап тергеу абақтыға қамаған. Қылмыстық кодекстің 99 бабы, 2 тармағы бойынша (қасақана кісі өлтіру) 19 жылға бас бостандығынан айрылды. Сондай-ақ, судья түзету мекемесінде ішімдіктен емдеу міндеттелсін деген үкім де кесіп берді.
Жас баланың әкесі жоқ. Анасы яғни Виталий Тоговскийдың қызы Надежда РЕЗЕНТЮК 16 жасында оң жақта отырып босанған. Перзентінен айрылып қара жамылып отырса да, әкесіне кесілген үкіммен келіспеді.
«Мен мынандай үкім шығады деп ойлаған жоқпын. Оның артында 4 кәмелетке толмаған баласы бар. Полицияға өз еркімен барып берілді ғой. Бұрын мүлдем сотталмаған.Соған қарағанда, мен сегіз жыл берер деп үміттенген едім. Бірақ бұл өте қатал үкім болды.19 жыл деген өмірінің жартысы ғой»,- деді қызы Надежда Резентюк.
Өз немересін өлтірген 39-жастағы жас ата мемлекетке 2 млн 131 мың 806 теңге төлеуі де міндеттелді. Ал қызы апеляциялық шағым беруге бекініп отыр.
