Дәрігерлер қызды ауруханадан алып кеткен анасын кінәлап отыр
Қарағандыда үш жасар Айзере ҚАҚАРМАНОВАНЫҢ өлімінің себебі анықталды. Баланың ішек инфекциясына ұшырап, энтероколит деген ауруға шалдыққаны белгілі болды.
Қарағанды облыстық денсаулық сақтау өкілдері сараптама қорытындысы шыққан бойда, БАҚ өкілдерін жинап баспасөз маслихатын өткізді.
«Он үш сағат бойы дәрігерлердің бақылауында болмағандықтан, қандай дәрі берді, не ішті, не жеді? Біз оны білмейміз. Сондықтан, нақты дәрігерлердің кінәсі деп айта алмаймыз. Жалпы мұндай ішек ауруынан баланың өліп кетуі мүмкін емес», деп хабарлады жиында облыстық денсаулық сақтау басқарма жетекшісінің орынбасары Гүлбану МАМАЛИЕВА.
Өз кезегінде баланың әкесі Орынбасар ҚАҚАРМАНОВ аталған вирусты дәрігерлер уақытысында анықтамаған дейді.
«Баланың ішегінде инфекция пайда болған. Соны салдарынан іш өту мен дене қызуы тоқтамаған. Баламды сеніп тапсырған дәрігерлер Айзереде ондай вирустың бар екенін де байқамаған. Менің балам кетті. Басқаның баласы да осындай салғырттыққтың құрбаны болмасқа кім кепіл?», деді қан жұтқан әке.
Естеріңізге сала кетейік, үш жасар қыз бала жаңа жыл түні, 31 желтоқсанда қайтыс болған.
Үш аптаның ішінде қызметтік тергеу толық аяқталған бойда, өлімге қатысы бар дәрігерлер өз жазасын алатын болады.
