Егер инвесторлар қазақ немесе орыс тілінде жүгінетін болса, онда сол тілдерде де жауап беріледі, дейді үкімет басшысы
Қазақстанда шетелдік инвесторларға мемлекеттік қызметтер ағылшын тілінде көрсетіледі. Бұл туралы бүгін елордада өтіп жатқан «Kazakhstan Global Investment Roundtable» форумында ҚР премьер-министрі Бақытжан САҒЫНТАЕВ айтты.
«Қазақстан Үкіметі инвесторлармен жұмыстың халықаралық позициясы мен стандарттарын әр уақытта да ұстанып келді және ұстана да береді. Біздің жұмысымыздың басты бағдары - заңның тұрақтылығы мен үстемділігін қамтамасыз ету. Қазақстан ашық ел болды және солай қала да береді. Біз ЭЫДҰ-ның Инвестициялар жөніндегі комитетіне кірдік. Осыған байланысты мен Үкіметтің бизнес үшін жай ғана жақсы емес, барынша үздік жағдай жасауға бел байлағандығын атап өткім келеді», - деді Бақытжан Сағынтаев.
Осы ретте ол ең біріншіден, инвесторлар үшін консультациялық қызмет нығайтылатындығын атап өтті.
«Сіздердің мемлекеттік органға немесе жергілікті атқарушы органға әрбір сауал салуларыңызға 10 жұмыс күннің ішінде ағылшын тілінде жауап берілетін болады. Бірақ, егер сіз қазақ немесе орыс тілінде жүгінетін болсаңыз онда біз сол тілдерде де жауап береміз. Алайда, біз ағылшын тілінде 10 күннің ішінде жауап беруге ниеттіміз. Екіншіден, біз кезең-кезеңімен 2020 жылдан бастап шетелдік инвесторларға мемлекеттік қызметтерді тек қана ағылшын тілінде ұсынуға көшетін боламыз. ХҚКО-ларда, мемлекеттік клиникаларда, мектептерде, мектепке дейінгі білім беру ұйымдарында, көші-қон, салық қызметтерінде ағылшын тілін білетін арнайы мамандар іріктеп алынады», - деді үкімет басшысы.
Премьер-Министр үшіншіден, инвесторлар үшін барлық негізгі нормативтік-құқықтық актілер ҚР СІМ, ИДМ және «Kazakh Invest» ұлттық агенттігінің сайтында ағылшын тілінде жарияланатындығын айтты.
«Төртіншіден, біз электронды виза, шекарадан өту, көші-қон есебіне алу және қауіпсіздік мәселелерін қоса алғанда шетелдік инвесторлардың елге келу шарттарын одан ары жақсартамыз. Барлық осы төрт бағыт бойынша әрбір өкілетті орган қажетті жұмыстарды түзеді», - деді Сағынтаев.
Дереккөз: ҚазАқпарат
Фото: Inform.kz
