Алматы облысында 17 күн бұрын жоғалған оқушы қыз ойын-сауық орталығынан табылды, деп хабарлайды ҚазАқпарат тілшісі.
Алматы облыстық ІІД баспасөз қызметінің мәліметінше, 14 қараша күні Ескелді аудандық ІІБ-ге Бақтыбай ауылының ерлі-зайыпты тұрғындары жүгініп, 14 жастағы қыздарының жоғалып кеткенін мәлім еткен. Мән-жайды анықтай келе, полицейлер қыздың Талдықорған қаласында 12 қараша күні жоғалғанын анықтады. Сол күні оқушы ата-анасымен қалаға барып, із-түзсіз кеткен. Анықталғандай, қыз баланың қаңғыбастыққа бейім екені де белгілі болды. Үйінен қашып кетуді әдетке айналдырғанынан мектеп мұғалімдері де хабардар екен. Осыған байланысты Ескелді ауданының полицейлері Талдықорғандағы әріптестерімен бірігіп, іздестіру шарасын ұйымдастырды. Нәтижесінде жоғалған қыз 28-нен 29-на қараған түні Талдықорғандағы ойын-сауық орталығының бірінен табылды.
«Оқушының айтуынша, ол осы уақыт аралығында өзінің жақын құрбыларының үйінде түнеген және жақын арада үйіне қайтуды жоспарламаған. Қызды Ескелді аудандық ІІБ-ге полицейлер жеткізді», деп мәлім етті облыстық ІІД баспасөз қызметі.
Полиция өкілдері қызбен тағы бір мәрте профилактикалық түсіндірме жұмыстарын жүргізді. Артынша баланы ата-анасы үйлеріне алып кетті.
