Алматыда жаңа жылдық мерекеде от шашудан 15 бала зардап шекті, деп хабарлады қаланың төтенше жағдайлар департаментінің баспасөз қызметінен.
«Алматы қаласы жедел медициналық көмек көрсету стансасының ақпарынша, медициналық көмекке түрлі жарақат алған 21 адам жүгінген. Олардың 15-і – балалар. Зардап шеккендердің жасы 2 мен 44 жас аралығында. 21 жағдайдың 12-сінде петардалар қолда жарылса, 9-ында ұшу бағытын өзгертіп, дененің әр түрлі бөлігіне түскен. Көздің күюінің 11 жағдайы, беттің күюінің 6, дененің әр түрлі бөлігінің күюінің 4 жағдайы тіркелген», - деп хабарлады сейсенбіде Алматының ТЖД хабарында.
Хабарда атап өтілгендей, Жаңа жыл қарсаңында құтқарушылар полициямен бірге Алматыда 3,5 тонна контрафактілі пиротехниканы тәркілеген.
«Жаңа жыл қарсаңында ТЖД Алматы қ. ІІД –мен бірге пиротехникалық заттардың санкцияланбаған сатылым орындарына рейд жүргізіп, 3,4 мың кг контрафактілі пиротехниканы тәркіледі», - деп хабарлады ТЖ жөніндегі департаменттен.
Сонымен қатар, құтқарушылар атап өткендей, пиротехникалық заттарды қолдану салдарынан бірде-бір өрт туындамаған. Алматы ТЖД петардаларды қолдану барысында қауіпсіздік шараларын сақтауға шақырды.
