Ақмола облысы, Ақкөл ауданында "WAKE UP 2017" грант берушілер форумы аясында "Сара Назарбаева атындағы табиғи саябақ" жобасының презентациясы өтті, деп хабарлайды ішкі саясат басқармасының өңірлік коммуникациялар қызметіне сілтеме берген sputnik.kz.
Жоба презентациясын "Тұрақты даму" Жер қоры президенті Алан БЕСЕН таныстырған. Жобаны Ақмола облысы табиғи ресурстар және табиғатты пайдалануды реттеу басқармасы мен Қазақстанның туроператорлары бірігіп жасады.
"Жобаның мақсаты – Ақкөлде биосфералық резерват құру. Яғни, биологиялық ресурстарды белсенді түрде пайдалану мен ерекше эко жүйені сақтау арасында баланс орнату. Табиғи саябақ ұйымдастырылған туристер легіне қызмет көрсетуге бағытталған бизнес жобалар арқылы жергілікті халықты өңірдің сирек кездесетін табиғи байлықтарын сақтауға жұмылдырады. Оның ішінде отбасылық демалысқа, саңырауқұлақ пен жидек теруге, жаяу және велосипед турларын ұйымдастыруға ерекше мән береміз. Инфрақұрылымның қаншалықты маңызды екенін көріп отырмыз", — деді Алан Бесен.
Жобаны Ақмола облысы әкімі Мәлік МУРЗАЛИНГЕ таныстырып, кейінірек республикалық деңгейде ұсынылады. Жобаны жүзеге асыру мерзімі мен саябақтың ашылу күні кейінірек анықталмақ. Жоба авторларының пікірінше, табиғи саябақтың арқасында өңірге туристер ағылатын болады.
