Қарағанды облысының Қарақұдық ауылында емделмейтін кеселдің кесірінен мал өлімі 20 басқа артты, деп хабарлады агентіктің тілшісі.
«Бүгінде Қарақұдық ауылында тағы бес жылқыда «эпизоотиялық лимфангинит» ауруы анықталды. Жалпы, кесел анықталғаннан кейін 20 мал жойылды», - деп хабарлады Қарағанды облысы ветеринарлық бакылау комитеті инспекциясының басшысы Марат Мухтаров дүйсенбіде.
Оның айтуынша, жойылған жануарлардың қожайындары қалыптасқан жағдайға түсіністікпен қарауда.
«Қарақұдық ауылының тұрғындары елдімекенде карантиндік режим жалғасып жатқанымен және кез-келген уақытта жануарлар емі жоқ ауруға шалдығуы мүмкін екенімен таныстырылды. Әр жойылған жылқы үшін қожайындарына мемлекеттен өтемақы төленеді», - деп толықтырды М.Мұхтаров.
Естеріңізге сала кетейік, 2018 жылы 8 қаңтардан бастап Қарақұдық ауылында 3 айға карантин жарияланды. Бұл елді мекенде эпизоотиялық лимфангинит ауруы анықталды. Ережеге сәйкес карантиндік кезеңде ауру мал тәркіленеді, кейіннен жойылады. Бұған дейін хабарланғандай, жылқыларда емделмейтін созылмалы инфекциялық ауру жағдайлары анықталған болатын.
