Астанада Қытай ұлттық опера, би және драма театрының концерті өтті, деп хабарлайды ҚазАқпарат тілшісі. Музыкалық кешті ҚР Мәдениет және спорт министрлігінің өкілдері, Қазақстандағы Қытай Халық Республикасының Төтенше жəне Өкілетті Елшісі Чжан Ханьхуэй, қала тұрғындары тамашалады.
Концерт басталар алдында сөз алған ҚХР Елшісі қонақтарды Қытайдың көктем мерекесімен (Қытай жаңа жылы - авт.) құттықтап, осы шараны ұйымдастыруға мұрындық болған ҚР Мәдениет және спорт министрлігі мен Астана қаласының әкімдігіне алғысын білдірді.
«Екі ел басшылары Нұрсұлтан Назарбаев пен Си Цзиньпиннің бастамасымен мемлекетаралық қарым-қатынас нығая түсті. «Бір белдеу - бір жол» жобасы және мәдени саладағы ынтымақтастық қазақ-қытай стратегиялық әріптестіктің дамуына оң серпін берді, - деді Чжан Ханьхуэй. Өз кезегінде, ҚР МСМ Мәдениет және өнер істері департаменті директорының орынбасары Әбіл Жоламанов министрлік атынан арнайы құттықтауды оқып берді. «Бұл мереке әлемнің көптеген елдерінде кеңінен тойланады. Мұндай мәдени шаралар халықтар арасындағы өзара түсіністікті одан әрі нығайтпақ», - деді Әбіл Жоламанов.
Айта кетейік, бұл Қытай ұлттық опера, би және драма театрының Қазақстанға алғашқы гострольдік сапары. Театр Қытайдағы көп жылдық тарихы бар ірі өнер ордасы болып табылады. Өнер ұжымы АҚШ пен Еуропаның көптеген елдерінің жоғары бағасын алған.
