Жыл соңына дейін елордада жаңа туған әр нәрестеге бір ағаштан отырғызылатын болады, деп хабарлады Астана әкімінің ресми сайтындағы хабарда.
«Астананың табиғи ресурстар және табиғатты пайдалануды реттеу басқармасы «Рухани жаңғыру» бағдарламасының «Саналы Азамат» жобасы аясында 2018 жылдың соңына дейін «Жаңа туған әр нәрестеге бір ағаштан» атты экологиялық акцияны өткізеді. елорданың жасыл белдеуінде көшеттерді егетін жер телімдері анықталды», - делінген жексенбіде жарияланған хабарда.
Хабарда айтылғандай, Астананың табиғи ресурстар және табиғатты пайдалануды реттеу мен денсаулық сақтау басқармалары бірлесіп жүзеге асырып жатқан «Жаңа туған әр нәрестеге бір ағаштан» акциясы қоғамды қоршаған ортаны қорғауға, тарихи дәстүрді сақтауға шақыруды, экологиялық білімді іс жүзінде насихаттауды, өскелең ұрпақтың қоршаған ортаға, салауатты өмір салтына деген сүйіспеншілік сезімін оятуды, қоғамның экологиялық мәдениетін арттыруды, жастарды ел игілігі үшін игі істер жасауға шақыруды көздейді.
Елордалық денсаулық сақтау басқармасының айтуынша, «Жаңа туған әр нәрестеге бір ағаштан» акциясының басынан Астана қаласының №1, №2, №3 Перинаталды орталықтарында дүниеге келген сәбилердің ата-аналарына 1704 құттықтау хаты тапсырылды.
