Қазақстанда балаларға арналған қауіпсіз 3556 сайттан тұратын «Ақ сайттар тізімі» жасалды, деп хабарлайды ҚазАқпарат. Жоба жасөспірімдер мен балаларға ғаламторды қауіпсіз түрде қолдануға мүмкіндік береді. Қазақстандық «Ақ сайттар тізіміне» балалардың психологиялық, физикалық тұрғыда толыққанды дамуына мүмкіндік беретін, тәрбиелік маңызы, тақырыбы мен мазмұны жағынан іріктелген 3556 сайт енген. Интернет желілері мазмұны бойынша білім және ғылым, мәдениет және өнер, ойын-сауық, музыка, кино, телевизия, табиғат, адам, қоғам, спорт және туризм салаларына бөлінген.
Жобаны ҚР Президентінің «Болашақ» халықаралық стипендиясы стипендиаттарының қауымдастығы әзірлеп отыр. ««Болашақ» қауымдастығы атынан үлкен жобаны таныстырғалы отырмыз. Желіде балалар мен жасөспірімдерді қауіп-қатерлерден қорғау үшін қауіпсіз сайттардың тізімін жасау қажеттілігі туындаған болатын. Балаларды интернеттің қауіпті тұстарынан ең алдымен ата-анасы қорғай алатынын білеміз. Сондықтан, балалардың қалыптасуына интернет заманында абай болуы керектігін білдіргіміз келеді», - дейді Парламент Мәжілісінің депутаты Бақтияр Мәкен. Интернет желілерінің контенттік сүзгісін модератор жүргізеді.
«Ақ тізім» балалардың танымды және адамды дамытатын ақпаратқа қызығушылығын арттырмақ. 3556 сайттың 500-і - қазақстандық. Ниет білдіргендер сайт тізімін тапсырыс арқылы алып, қолдана алады. Бақтияр Мәкеннің айтуынша, сараптама көрсетіп отырғандай, Қазақстандағы ата-аналардың 57 пайызы балалары интернеттен өз жасына сай келмейтін мәліметті алуы мүмкін деп қауіптенеді екен. Ал ата-аналардың 18 пайызы балаларының интернетте не қарап отырғанынан мүлде хабарсыз болып шықты. Өз кезегінде Ақпарат және коммуникациялар вице-министрі Алан Әжібаев та тың жобаға қатысты пікірін білдірді. «Бүгінгі ақпараттық технологиялардың балаларға қаншалықты қауіпті болуы мүмкін екенін білуіміз керек. Интернетте балалардың оқуына болмайтын мәліметтер жетерлік. «Ақ сайттар тізімі» - біздің медиакеңістіктегі маңызды қадам. Бұл мәселе бүкіл әлемнің назарында. Сондықтан, оны назардан тыс қалдырмау керек», - дейді Алан Әжібаев.
