Келесі жылдан бастап ХҚКО-ға бармай-ақ электронды үкімет порталы арқылы тұрақты тіркеуге тұруға болады. Бұл туралы ҚР ішкі істер министрінің орынбасары Ерлан Тұрғымбаев мәлімдеді деп хабарлайды sputnik.kz.
«Қазіргі уақытта ХҚКО-ға бармай-ақ электронды үкімет порталы арқылы тұрақты тіркеуге тұру және азаматтарды тіркеуден шығару механизмі пысықталды. Оны 2018 жылы іске қосу жоспарланып отыр», — деді Е.Тұрғымбаев.
Ақпарат және коммуникациялар, әділет, ішкі істер министрліктерінің ақпараттық жүйесін кіріктіру негізінде «Электронды үй кітапшасы» әзірленді. Ол әрбір елді мекен бойынша халықтың көшіп-қонуына мониторинг жүргізуді жақсартады, үйдің иесіне оның меншігінде тіркеуге тұрған адамдар туралы мәлімет алуға мүмкіндік береді.
Мемлекеттік қызмет көрсетуді жеңілдету және процестерді жылдамдату үшін ІІМ оларды электронды үкімет порталы арқылы автоматтандыруды белсенді енгізуде.
Сонымен қатар, 2017 жылдың басында ХҚКО-ға бармай-ақ, онлайн режимде «электронды үкімет» порталы арқылы уақытша тіркеу жүргізу мүмкіндігі туды.
Осы жылдың 1 қарашасынан бастап уақытша және тұрақты тіркеу кезінде тұрғын үйге меншік құқығы туралы 2-нысанды анықтаманы талап ету жойылды (тек 25 күн ішінде 138 мың адам тіркеуге тұрды, оның ішінде 115 мың адам – тұрақты тіркеуге және 23 мың адам уақытша тұратын орны бойынша тіркелді).
