Ағымдағы жылы Қазақстандағы қауіпті өндірістік нысандарда 11 апат болды. Бұл туралы Үкімет отырысында ҚР Инвестициялар және даму министрі Жеңіс Қасымбек мәлім етті, деп хабарлайды ҚазАқпарат.
«Ағымдағы жылдың 10 айы ішінде республиканың қауіпті өндірістік нысандарында 11 апат орын алды, ал 2016 жылдың дәл осы кезеңінде 14 апат болған (21 пайызға төмендеді). 12 адам зардап шегіп, 4 адам қаза тапты», - деді министр.
Бүгінде министрліктің қадағалауында 230 мыңнан аса қауіпті өндірістік нысанды қамтитын 9 мыңнан аса кәсіпорын бар. Осы орайда жерасты кеніштері мен көмір шахталары, карьерлер мен разрездер, мұнай және газ өндіру кен орындары, металлургия, сондай-ақ химия, мұнай өңдеу зауыттары, атом өнеркәсібі, магистральдық құбырлар қамтылған.
Ведомство басшысының айтуынша, соңғы жылдарда қауіпті өндірістік нысандардың апатсыз жұмысы бойынша оң қарқын байқалуда.
«Осылайша, 2016 жылғы апаттардың саны 2008 жылмен салыстырғанда 60 пайызға (58-ден 23 апатқа) азайды. Апат нәтижесінде зардап шеккендер саны 4 есеге (102 адамнан 28 адамға) төмендеген», - деді Жеңіс Қасымбек.
Белгілі болғандай, кесте бойынша тексеруге тек тәуекелі жоғары дәрежелі нысандар ғана тартылады. Қалған нысандарға жоспардан тыс тексерулер және бақылаудың басқа түрлері жүргізіледі.
«Өрескел бұзушылықтар болмаса, адал кәсіпкерлерді тексеруден босату түрінде көтермелеу, сондай-ақ оларды қауіпті өндірістік нысандар тізбесінен алып тастау мүмкіндігі көзделген. 2017 жылдың 10 айы ішінде 1558 тексеру жүргізілген, олардың арасында кестеге сәйкес - 923, жоспардан тыс - 635», - деді министр.
Тексеру барысында 40 мыңнан аса бұзушылық анықталды, адамдардың өмірі мен денсаулығына қауіп төндіріп тұрған 880 қауіпті өндірістік нысан уақытша тоқтатылды. Сонымен қатар 124,5 млн теңгеден аса сомада 1821 айыппұл салынды.
