Қазақстан азаматтарына АҚШ тарапынан берілетін визалардың саны артып келе жатыр. Бұл жайлы бүгін ҚР СІМ вице-министрі Ержан Ашықбаевпен кездескен Оңтүстік және Орталық Азия бойынша АҚШ мемлекеттік департаметінің жоғары лауазымды өкілі Элис Уэллс айтты, деп хабарлайды ҚазАқпарат.
«Бүгінгі отырыс барысында консулдық мәселелерді қаузадық. Біздің сарапшылар бұл бағыттағы жұмысты түстен кейін де талқылайтын болады. Қазақстан азаматтарына берілетін визалар санының артып келе жатқанына қуанышымды білдіремін. Біз қазіргі уақытта бизнестік және туристік мақсаттарға байланысты 10 жылдық виза беруді жолға қойдық. Қазақстандық әріптестеріміздің бұл жұмысқа көзқарасын білгіміз келеді. Біз визалық тәртіп пен консулдық жұмыстар біздің серіктестігіміз аясында тиімді жұмыс істегенін қалаймыз», - дейді Элис Уэллс.
Өз кезегінде ҚР СІМ вице-министрі Ержан Ашықбаев консулдық саладағы екі ел арасындағы өзара әрекеттестікті үлгі тұтарлық деп атады. Ол қазақстандықтарға Америкаға бару үшін берілетін визалардың санына, 10 немесе 5 жылдық визалардың берілу шараларына жоғары баға берді.
Еске сала кетсек, бүгін ҚР СІМ басшысының орынбасары Ержан Ашықбаев пен Оңтүстік және Орталық Азия бойынша АҚШ мемлекеттік департаметінің жоғары лауазымды өкілі Элис Уэллс кездесу өткізіп, екі елдің арасындағы қарым-қатынастарды, Ауғанстан мен Кореядағы шиеленісті реттеу, сонымен бірге ДАИШ-тың (Қазақстанда және өзге елдер аумағында тыйым салынған) біржолата жеңілгеніне көз жеткізу мәселелерін талқылаған болатын.
