Парламент Мәжілісінің жалпы отырысында палата депутаттары «Қазақстан Республикасының кейбір заңнамалық актілеріне баланың құқықтарын қорғау жөніндегі функцияларды жүзеге асыратын ұйымдардың қызметі мәселесі бойынша өзгерістер мен толықтырулар енгізу туралы» заң жобасын бірінші оқылымда мақұлдады, деп хабарлайды ҚазАқпарат.
Заң жобасындағы түзетулердің бірінде кәмелетке толмағандар жасаған іс-әрекеттер үшін ата-анасын және басқа да адамдарды жазалауға қатысты норманы Қылмыстық кодекстен алып тастап, Әкімшілік құқық бұзушылық туралы кодекске ауыстыру ескерілген. Сонымен қатар құжатта балалардың аталған іс-әрекеттері үшін айыппұлды 200 АЕК-тен 10 АЕК-ке дейін азайту қарастырылған.
Өз кезегінде Мәжіліс Төрағасы аталған ұсынысқа қолдау білдірді. «Бұл қадамдар толықтай әкімшілік әрі қылмыстық заңнаманы ізгілендіру бойынша трендке сәйкес келеді», - деді Нұрлан Нығматулин.
Осы орайда ол балалар тарапынан теріс қылықтар болып жататынын, сондықтан бірден қылмыстық жауапкершілікке тартудың қажеті жоқ екенін жеткізді.
Сонымен қатар Н. Нығматулин айыппұлдар сомасы төмендеген жағдайда, балалардың тәрбиесі мен осындай теріс қылықтарға жол бергізбеу бойынша мәселеге ата-аналардың тиісті деңгейде мән бермеуі мүмкіндігіне алаңдаушылық білдірді.
Оның пайымынша, ата-аналар мен балалар үйлеріндегі педагогтар әрдайым жеткіншектердің тәрбиесінде жауапкершілікті сезінуі тиіс.
«Жұмыс тобы аталған мәселені екінші оқылымға дейін тағы да пысықтауы керек», - деді Нұрлан Нығматулин.
