Павлодар облысының әкімі Болат Бақауов 2018 жылы оралмандардың әр отбасының жағдайымен танысуға уәде берді.
Бүгін облыстық әкімдікте өткен біріккен алқа жиынында аймақ басшысы биыл арнайы аудандардан автобустармен оралмандарды жеткізіп, бөлім басшыларымен бірге кездесетінін айтты деп хабарлайды pavlodarnews.kz.
Облыстық жұмыспен қамту және әлеуметтік бағдарламалар басқармасының басшысы Қайрат Нұрмағамбетовтың айтуынша, биылғы жылы Ертіс өңіріне келген 323 адам оралман мәртебесін алған. Олар Павлодар, Ақсу, Екібастұз қалаларына және Баянауыл, Павлодар, Май, Успен, Шарбақты, Ертіс, Лебяжі, Ақтоғай аудандарына қоныстанған. Оның ішінде еңбек етуге жарамды 185 адамның 41-і тұрақты жұмыспен қамтылған. Өздігінен табыс тауып отырғандар - 112, бала күтімімен отырғандар - 14, жұмыссыздар саны - 18. Өңірлік квотаға енгізілген 50 отбасына мемлекеттік қолдау көрсетілген. Мәселен, Успен ауданына қоныстанған оралмандар 25-100 гектардан жер алуға ниет білдірген. Дегенмен оларға оралман мәртебесін алғаннан кейін ғана жер телімі жеке меншікке беріледі. Ал, әзірге жалға алуға тура келеді.
- Бұдан басқа, ішкі көші-қон бойынша Оңтүстік Қазақстан, Маңғыстау, Жамбыл, Алматы және Қызылорда облыстарынан қоныс аудару жүзеге асырылады, - деді Қайрат Нұрмағамбетов. - Жыл басынан бері көшіп келген 69 отбасының 68-і өңірлік квотаға енгізілген. Қоныс аудару бойынша бүгінде Май ауданы квотаны игермеген. Биылғы жылы жеті шаңырақ келген болса, бір отбасы ауа райы жағдайына байланысты қайтадан кетіп қалған. Екі отбасы да квотаны тосып, қараша айында кері қайтқан. Келесі жылы қоныс аударушыларды қабылдау квотасы тоғыз есе артады. Облыс әкімі бұл мәселеде қағазбастылыққа жол бермеу керектігін және қоныс аудармас бұрын құжаттарды толық тексеріп алу қажеттігін ескертті. - Елбасы құрылтайда «қарсы алу үшін жүректің жылуы керек» деп айтпады ма?, - деді Болат Бақауов. - Бұл мәселе осылай шешімін тапқанғанға дейін олар басқа өңірге де көшіп кетеді. Ал, біздің өңірде ауылдық аймақтарда жұмыс күші тапшы. Келесі жылы уақыт тауып, міндетті түрде қандай көмек көрсетілгенін қарап шығамын. Жұмыссыз, аз қамтылған, қоныс аударған отбасыларды және оралмандарды жұмыспен қамту бойынша жүйелі жұмыс жүргізу керек».
