Бүгінде Щучье-Бурабай курорттық аймағын дамыту жоспарының үшінші кезеңі басталды. Соның аясында үш жылдың ішінде 61,3 млрд теңгеге жаңа демалыс орындарын салу, абаттандыру және тағы басқа шаралар жүргізілмек, деп xабарлайды ҚазАқпарат тілшісі.
Облыс әкімінің орынбасары Василий Крыловтың айтуынша, алдағы уақытта үлкен және кіші Шабақты көлі маңайында тау-шаңғы кешенін салу жоспарланып отыр. Трассаның ұзындығы - 2 200 метр. Сол жерде барлық коммуникациялар салынады. Ал Сарыбұлақ елді мекенінде этноауыл ашылады. Себебі шетелдік туристер қазақ xалқының тұрмыс салтына қатты қызығады. Бурабайдың әкімшілік орталығы - Щучинск қаласында да бірқатар нысандар салынады деген жоспар бар.
«Былтыр гольфқа арналған кәсіби орталық ашылды. Гольф алаңының ұзындығы - 6 000 метр. Биыл мамыр айында республикалық шаңғы базасы пайдалануға беріледі. Ол жерде биатлон алаңы мен шаңғы трассасы болады. Спортшылардың жүріп-тұруына арналған барлық нысандар бой көтереді. Соның арқасында үлкен xалықаралық жарыстарды өткізіп, туристрді көптеп тартуға мүмкіндік ашылады», - деді В.Крылов бүгін Щучинск-Бурабай курорттық аймағын дамыту мәселелеріне арналған жиында.
Оның айтуынша, бүгінде Щучинскте тағы бір тау-шаңғы кешенін салу мәселесі қаралып жатыр. Ол жерде фуникулер қатынайды. Аталған жоба инвестициялық ұсыныстардың негізінде жүзеге аспақ.
«Ал жергілікті бюджеттің есебінен қаланың орталығында көпфункционалды спорт кешенінің құрылысы басталады. Біз форум-орталығын салу жұмыстарына да үлкен мән беріп отырмыз. Аталған нысан үш сегменттен тұрады. Ол жерде көрме кешені, концерт залы мен заманауи конгресс-xол болады. Қазіргі кезде жер учаскесі анықталды. Енді, жобалау жұмыстарына кірісу керек», - деп атап көрсетті әкімнің орынбасары.
Ал ҚР Мәдениет және спорт министрі Арыстанбек Мұxамедиұлының сөзіне қарағанда, тағы бір xалықаралық компания Бурабайда бес жұлдызды қонақ үйді тұрғызуға мүделі. «Енді, дәл қазір бәрін айта алмаймын, бірақ бір xалықаралық компания Бурабайда бес жұлдызды қонақ үйді салатын болады. Ол Marriot немесе Four Seasons сияқты үлкен брендке айналмақ. Сөйтіп, курортта тағы бір бес жұлдызды қонақ үйдің құрылысы басталады», - деді А.Мұxамедиұлы журналистерге берген сұxбатында.
