ҚР Үкімет басшысы Бақытжан Сағынтаев мүдделі министрліктерге «АрселорМиттал Теміртау» компаниясындағы жағдайға назар аударуды тапсырды, деп хабарлайды ҚазАқпарат.
Үкімет отырысы барысында Премьер-Министр аталған компанияның өнеркәсіптік қауіпсіздікті арттыру мен өндірістегі қайғылы оқиғаларды төмендету жөніндегі мақсат-міндеттеріне баға берді.
«Әрине, осындай жоспардың болғаны жақсы. Алайда 2025 жылға дейін осы бағдарламаны созу - бұл тым ұзақ мерзім. Менің ойымша, сіз атап өткен жұмыстарды қайта қарастырып шығу керек. Сонымен бірге кеше компанияның басшылары қосымша инвестициялар жайында айтқан болатын, яғни бұл қомақты қаржы алдағы жылдан компания жұмысына салынбақ. Осы орайда қажетті соманы компаниядағы өнеркәсіптік қауіпсіздікті қамтамасыз етуге бағыттауға болады. Себебі жыл сайын сіздердегі жағдайлар төмендемей отыр. «АрселорМиталл Теміртауда» қалыптасып отырған ахуалға министрліктер мен кәсіподақтар назар аударуы тиіс деп ойлаймын», - деді Бақыт Сағынтаев аталған компанияның басшысы Парамжит Калонның баяндамасын тыңдағаннан кейін.
П. Калон өз сөзінде компания жыл сайын жабдықтарды жаңарту мен өнеркәсіптік қауіпсіздікті арттыруға қомақты қаржы жұмсайтынын атап өтті. Шаралар қабылданғанымен, апаттар орын алуда. Бұл ретте өндірістерде адамдар тәуекелдерді жете бағаламайды, сондай-ақ басшылық тарапынан да кемшіліктерге жол берілген.
Оның пайымынша, қайғылы оқиғаларға білікті жұмыс күшінің жетіспеуі мен жас буынның тау-кен кешенінде жұмыс істеуге қызығушылық танытпауы ықпал етуде.
Сонымен қатар Парамжит Калон Қазақстандағы көмір шахталары әлемдегі ең қауіпті кен орындарының бірі екенін, себебі шахталарда газдың таралуы проблемасы бар екенін жеткізді.
Компания адамдардың өліміне алып келетін қайғылы оқиғаларды мүлдем болдырмау бағытында 2025 жылға дейін тиісті шараларды атқаруды көздеп отыр.
