Шұғыл хабаршы (мессенджер) арқылы лаңкестік әрекет жасауға шақырғаны үшін ер азаматқа 6 жылға бас бостандығынан айыру жазасы берілді, деп хабарлайды Оңтүстік Қазақстан облыстық сотының баспасөз қызметі.
Ведомство сайтында жарияланған хабарда айтылғандай, Терроризмді насихаттау және терроризм актісін жасауға жария түрде белгілері бар мазмұндағы материалдарды таратқаны үшін ер азамат сотталды. Шымкент қаласының Қаратау аудандық сотында сотталушы Д.Я.-қа қатысты қылмыстық істің қаралуы аяқталды.
Сотталушы Д.Я. «Whats App» телекоммуникациялық желісіндегі «Муслим Ва Муслималар» атты әлеуметтік топқа ұялы телефон нөмірі арқылы мүше болып, 30 қазан 2017 жылы сағат 19:30-да «Ал-Ихван аль-Муслимун» халықаралық террористік ұйымының көзқарастарына жататын терроризмді насихаттау және терроризм актісін жасауға жария түрде белгілері бар мазмұндағы материалдарды «Муслим Ва Муслималар» әлеуметтік тобының мүшелеріне таратқан.
Содан кейін Д.Я. 12 қараша 2017 жылы сағат 12:21-де «Муслим Ва Муслималар» әлеуметтік тобының мүшелеріне «VID-20171112-WA0001» атты бейне роликті таратқан.
Сот үкімімен сотталушы Д.Я.-тың жасаған қылмысының қоғамға қауіптілігі мен сипаты ескеріліп, прокурормен жасалған кінәні мойындау туралы мәміле түріндегі процестік келісім бекітіліп, Қазақстан Республикасы ҚК-нің 256-бабының 2-бөлігінде көрсетілген қылмысты жасағаны үшін кінәлі деп танылып, 6 /алты/ жыл мерзімге бас бостандығынан айыру жазасына сотталып, жазасын қылмыстық – атқару жүйесінің орташа қауіпсіз мекемесінде өтеуге деп белгіленген.
Сот отырысы аяқталған соң төрағалық етуші тараптарға қабылданған үкім мен қылмыстың орын алған себептерін және де процестік келісім бойынша іс жүргізудің ерекшеліктерін түсіндірді.
Үкім заңды күшіне енген жоқ.
