ҚР энергетика вице-министрі Ғани Сәдібеков ОКҚ-де өткен Қазақстанның экологиялық ұйымдары қауымдастығының таныстырылымында елорда аспанын тұмшалаған көк түтіннен қалай арылуға болатынын айтты, деп хабарлайды sputnik.kz.
«Жақында энергетика министрлігі осы мәселеге қатысты біраз ақпарат таратқанын өздеріңіз жақсы білесіздер. Қазақстанның орталық өңірлерін газдандыруға қатысты құжаттар мемлекеттік экологиялық сараптамадан өтіп, оң қорытындысын алды. Қазіргі уақытта бұл мәселе үкіметте талқыланып жатыр», — деді вице-министр.
Сәдібековтің айтуынша, Астананың ауасын, негізінен, энергетика орталықтары ластайды.
«Бұл мәселені елорданы газдандыру арқылы шешуге болады. Екіншіден, ол – автокөліктер. Қазіргі таңда елорда әкімдігі тиісті органдармен бірлесіп қоғамдық көліктерді «экологияландыру» бағытында белсенді жұмыс істеп жатыр. Сондай-ақ, өкілетті органдар автокөліктен шығатын газ шығарындыларының нормадан аспауын қатаң қадағалауда. Автокөліктердің бәрін Еуро-4, Еуро-5 талаптарына келтіру жұмыстары жүргізіліп жатыр. Бұған қоса, былтырдан бері мемлекет ескі көліктерді қабылдап, оның орнына ақшалай сертификат беру бастамасын қолға алды. Бүгінгі таңда бұл жұмыс еліміздің 16 өңірінде іске асып келеді. Менің ойымша, қабылданып жатқан шаралардың барлығы көз ұзамай елорда ауасының тазаруына септігін тигізеді», — деді вице-министр.
