Жаңаөзен маңындағы теміржол өткелінде болған жол апатынан зардап шеккен 15 науқас ауруханадан шығарылды. Бұл жайлы Жаңаөзен қалалық ауруханасының емдеу жұмыстары жөніндегі орынбасары Раушан Жапарова мәлім етті, деп хабарлайды «ҚазАқпарат» ХАА тілшісі.
«Біздің ауруханамыздың бөлімшелерінде тағы тоғыз науқас емделіп жатыр. Олардың барлығының жағдайы ауыр болды. Екі адам әлі жансақтау бөлімінде. Олардың жағдайы тұрақты, дәрігерлердің күшімен ауыр күндердің бәрі артты қалды», - деді Р.Жапарова.
Ол сондай-ақ, хирургия бөлімшесінде тағы үш адамның, травмотология бөлімшесінде төрт адам жатқанын хабарлады.
«Жаңаөзен ауруханасына түскен 2003 жылы туған бала бірнеше жерінен жарақаттанған, бас сүйек-миы зақымданған, миы шайқалған, ішінен жарақат алған. Ол ұзақ уақыт бойы жасанды тыныс алдыру аппараты арқылы тыныс алды, қазіргі уақытта өкпе жасанды желдету аппаратынан босатылды. Бүгінгі таңда науқастардың жағдайы айтарлықтай жақсарды деп айтуға толық негіз бар», - деді Р.Жапарова.
Айта кетейік, 25 қараша күні Жаңаөзен қаласы маңындағы Теңге ауылына жақын жердегі теміржол өткелінде тепловоз жолаушылар тасымалдайтын «ГАЗельге» соғылған болатын. Жол апаты салдарынан 36 адам зардап шекті. 9-ы қаза тауып, 27-сі ауруханаға жеткізілді.
Бұған дейін хабарланғандай, облыс әкімінің бұйрығымен қаза тапқан азаматтардың отбасыларына 1 млн теңге, аурухананың жансақтау бөлімінде ауыр халде жатқан 9 науқасқа 500 мың теңге бөлу туралы тапсырма берілді. Қалған 18 зардап шегушіге 300 мың теңгеден бөлінеді.
