Сот әділдігін рейтингке құрбан етуге болмайды. Бұл туралы бүгін сот төрелігін жүзеге асырудың 2017 жылғы қорытындысына арналған кеңейтілген кеңесте ҚР Жоғарғы сотының төрағасы Жақып Асанов айтты, деп хабарлайды ҚазАқпарат.
«Судьялардың тәуелсіздігі бойынша үлкен жұмыс жүргізілді. Бірақ, судьялардан маған келетін ұсыныстарда бірқатар жүйелі проблемаларды ашып көрсетеді. Қазір көпшілігі жасырын емес, ашық жазады. Барлығы да бірауыздан судьялар төрағаға тәуелді дейді. Дәл солар кімді өсіру керектігін, кімді жазалау қажеттігін, ал кімді көтермелеуді шешеді. Оларда кез келген судьяны тексеру, актілерінің күшін жою сынды билік бар. Біз мұны өте жақсы білеміз. Судьялар, тіпті бизнес қоғамдастығы да мұны жақсы біледі», - деді Жоғарғы сот төрағасы.
Оның атап өтуінше, судьялардың жауапкершілігі шешілетін немесе басқа лауазымға ауысатын кезде төраға беретін мінездеме де қысым жасаудың құралына айналған.
«Иә, төралқа бар. Бірақ, төралқа сот төрағасының ұстанымына қарамастан шешім шығарған бірде бір жағдай жоқ», - деді ол.
Жақып Асановтың айтуынша, көңілден шықпаған судьяға күрделі істерді үйіп тастап, одан кейін наразылық білдіру деректері де бар. Сонымен қатар ол өңірден хат жазған адвокаттың облыстық соттардың заңсыз үкімдерге көз жұма қарайтындығын, мұның себебі рейтинг құлау екендігін ашық айтқанын атап өтті.
«Өйткені, төраға үшін бұл ең бастысы. Міне, заңгер осынау жарысты доғаруды сұрап отыр. Судьялардың тәуелсіздігі проблемасы біздің жүйеміздің ішінде де тереңдеп кеткені ме? Жалпы, Мемлекет басшысы жұмыс істеуіміз үшін барлық жағдаймен қамтамасыз етті. Біз өз ішімізде проблема жасап отырмыз. Бағалау жүйесіне қарайықшы. Ол судьяны көрсеткіштің соңына жүгіртпеуі тиіс. Сот әділдігін рейтингке құрбан етуге болмайды», - деді Жақып Асанов.
Кеңейтілген кеңес барысында Жақып Асанов дауласушыларды сотқа жеткізбей татуластыратын орган құруды ұсынды.
Сонымен қатар ол облыстық соттардың Жоғарғы сотқа жіберетін статистикаларында жалған деректер көп екендігін ашық айтты.
