Жаңаөзенге жақын жерде болған жол апатынан зардап шеккен балалар ауыр халде. Бұл туралы өңірлік коммуникациялар қызметінің брифингінде облыстық балалар ауруханасының бас дәрігері Кәмшат Тұрсынбекова айтты, деп хабарлайды «ҚазАқпарат» ХАА тілшісі.
«Облыстық балалар ауруханасының жансақтау бөлімінде алты жасар ұл мен 10 жасар қыз жасанды тыныс алу құрылғысында жатыр. Балалар травматикалық шок алған. Қыздың екі аяғына ампутация жасалды, бас сүйек-миы зақымданған және көптеген жарақаттары бар. Ұлдың да бас сүйек-миы зақымданып, іші және көптеген дене мүшелері жарақаттанған», - деді Кәмшат Тұрсынбекова.
Бұдан бөлек, ол балаларды Астанадан келген травматолог-ортопед дәрігердің тексергенін атап өтті.
Маңғыстау облыстық денсаулық сақтау басқармасы басшысының міндетін атқарушы Клара Оралбаеваның айтуынша, үш зардап шегуші Ақтаудағы медициналық мекемелерге жатқызылған. Жаңаөзен қалалық ауруханасының жансақтау бөлімінде алты адам жатыр. Олардың жағдайы тұрақты ауыр деп бағалануда. Қалған 18 адам травматология бөлімінде ем алуда. Олардың жағдайы - орташа ауыр.
Бұдан бұрын хабарланғандай, 25 қарашада 14 сағат 20 минутта Маңғыстау жол бөлімінің Өзен-Болашақ теміржол өткелінде «Газель» маркалы маршруттық автомобиль тепловозбен соқтығысқан. Өткелдік сигнал беру жабдығы дұрыс істеп тұрған. Тепловоз машинисі 60 км/сағ жылдамдықпен келе жатып, жолдағы автомобильді көргеннен кейін шұғыл тоқтайды. Алайда, соқтығысудың алдын алу мүмкін болмаған.
