Ауғанстан қауіпсіздігі жөніндегі ұлттық дирекция басшысы Мохаммад Масум Станекзай өткен аптада 195 лаңкестің ұсталғаны туралы мәлімдеді, деп хабарлады TOLONews телеарнасына сілтеме жасаған ТАСС.
«Бір аптада 195 лаңкес ұсталды. Олардың ішінде тәжіктер мен ұйғырлар да бар», - деп келтіреді жексенбіде елдің күш ведомстволары басшыларының ортақ баспасөз мәслихаты барысындағы ведомство басшысының сөзін.
Сондай-ақ, ол Кабулде 20 қаңтарда «Интерконтиненталь» қонақ үйін жаруға дайындалған бес күдіктінің ұсталғаны туралы да айтты, алайда тағы бір күдікті елден қашып үлгерген.
Ұлттық қауіпсіздік қызметінің басшысының ақпарынша, елдің сыртында медресе бар (ислам оқу орындары), содырлар паналайтын жер мен оқу-жаттығу лагерлері бар. Ол пәкістандық діни уағыздаушыларды Ауғанстанда зорлық-зомбылықты тұтандырып отыр деп айыптады және екі ел шекарасынан алыс емес жерде пәкістандық Кухлакте жанкештілерді дайындайтын лагерь бар екенін айтты.
Баспасөз мәслихаты барысында елдің ішкі істер министрі Ваис Ахмад Бармак лаңкестердің 27 қаңтардағы терактіде бір емес екі жедел-жәрдем көлігін пайдаланғанын мәлімдеді. Бірінің іші жарылыс затқа толтырылса, екіншісі артынан ілесіп отырған. Сонымен қатар, министр Кабулдағы сенбіде болған терактіден 30 полицейдің зардап шеккенін және көбінің қайтыс болғанын жеткізді. Бұған дейін қорғаныс министрінің м.а. Тарик Шах Бахрами соңғы екі туәлікте 100 содырдың көзі жойылғанын және елде 20-дан астам белсенді повстандық топтардың барын мәлім еткен еді.
Бұған дейін хабарланғандай, бір аптада Ауғанстан астанасында екі террорлық акті орын алды. 27 қаңтарда Кабулде болған теракті салдарынан кем дегенде 103 адам мерт болып, 235-і жараланған. 20 қаңтарда қаруланған адамдар тобы шетелдіктер арасында танымал «Интерконтиненталь» қонақ үйіне басып кірген, ол кезде 43 адам қаза болған. Екі жағдайда да жауапкершілікті «Талибан» қозғалысы өз мойнына алып отыр.
