Ақпараттық жағынан қауіпсіздік мәселесі қылтилап тұр
Екінші тоқсан алдында оқушылар шаштарын алып дайындық үстінде, бүгінгі шаштараздағы көрініс бұл.
Десе де, күзгі демалыс күндері балалар әлі де болса смартфондарынан бастарын алмаған секілді. Тілдесулері орысша, орысша болғанда да қысқартылған сөздерінің аяғы жұтылған сленгтер. Әкелері мен ағалары кезектерін күтіп отырып "қазақша сөйле" деп ескертумен әлек үрім-бұтақтарына.
Мен үндемедім. Іштей ұлттық тәрбиелері бар екен деп отырдым.
Осыдан бір нәрсені аңғардым.
Қанша дегенмен, қазақ отбасында қазақша сөйлесіп, ана тілінде бүгінгі ұрпақтың тілін сындырсақ та, мына сұм смартфон әлемі дес бермейтін сияқты. Шүлдірлеген күйі, онсыз да бай тілді құрбандыққа шалып, дүбаралыққа итермелеген тілін алашұбартып жалмап бара жатыр өскелең өркенні.
Өкініштісі, бұның дауасы әлі жоқ. Бүкіл смартфон іші толы орысша ойындар, атаулар, жазбалар, ютуб толған ақпараттар тағы сондай.
Не істемек керек?!
Смартфон ішіне, әлемжелі төріне қазақ тілі неге шыға алмай жатыр?! Онда да әлемжеліге шығам дегенше ана тілі, тұтас ұрпақ ауысып өзгеріп шыға келмек. Сонда көкесі көрінеді ұлтсыздықтың деп, қамыққан бойы шаштараздан қалай ытқып жөнеле кеткенімді де байқамай қалыппын.
Смартфонның пайдасына кенелеміз деген қоғам, мақтамен бауыздалған тілсіз, ділсіз, мәңгүрттеніп бара жатқандай, оның үстіне жансыз жасанды интеллект қосылса қайтеміз.
Ақпараттық жағынан қауіпсіздік мәселесі қылтилап, ұлттық қауіпсіздігін бір-ақ шайқалтады керек болса бұл індет.
Түсінген ойлыға сигнал.
Бір ұғынғаным, смартфонның кесірі ұлттың буынсыз рухани жеріне қатты тиюде.
Қайдам...
Дереккөз: Мақсат Жақаудың Facebook-тегі парақшасы. Автордың рұқсатымен жарияланды.
Фото: facebook.com/maxatzhakauov.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
