Су беріңдер! Ақтаулықтар судың жоқтығынан жолды жапты
Ақтаудағы 32В шағын ауданындағы “Шаңырақ” кешенінің тұрғындары үйлерінде судың жоқтығынан далаға шығып, жолды жабуға мәжбүр болды.
Бұл 3 қыркүйекте кешкісін болған оқиға. Үш ай бойы тұрақты сусыз отырған ақтаулықтар басқа шараның жоқтығынан көлік жүретін жолға шығып, суды тұрақты беруді талап етті. Оқиға орнынан түсірілген видеоны Lada.kz жариялады.
Видеода “Шаңырақ” тұрғындарын жолдан күшпен сүйреп шығаруға тырысқан полицейлер түсірілген.
Жағдайға қатысты Ақтау қаласының әкімдігі түсініктеме берген екен:
“32В шағын ауданындағы №12 үйдің ауласында сағат 20:30-да “Шаңырақ” тұрғын үй кешенінің тұрғындары ауыз судың жоқтығы мәселесіне байланысты жиналды. “Шаңырақ” тұрғындарымен әкімдік қызметкерлері, Ақтау прокуратурасы өкілдері және “Каспий жылу, су арнасы” МКК өкілдері түсіндіру жұмыстарын жүргізді. Уәкілетті тұлғалардың түсіндіру жұмыстарынан кейін тұрғындар үйлеріне тарады”, - делінген ресми хабарламада.
Әкімдік ЦУВС-4 резервуарларындағы ауыз су деңгейін сақтап тұру үшін “Каспий жылу, су арнасы” Ақтауға берілетін су қысымын күнде әдейі төмендететуге мәжбүр екенін еске салды. Қалыпты қысым сағат 18:00-ден кейін пайда болады.
Ақтау тұрғындары мұндай “жол жабу” шарасына бірінші рет барып отырған жоқ. “Шаңырақ” тұрғындары 2023 жылдың қараша айында да дәл осы себеппен жолды жауып тастаған болатын. Сол кезде қала әкімдігі желілер құрылысшының меншігінде екенін және сумен жабдықтауды қалпына келтіру жұмыстары жүргізілгенін хабарлаған.
Биыл маусым және шілде айларында 19-шы шағын ауданның тұрғындары жолды жабуға шыққан болатын. Ол кезде де билік су береміз деп уәде етіп құтылған.
Фото: видеодан кадр / lada.kz.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
