Алматының барлық ауданында "Бақытты отбасы" орталығы негізінде "ISKER ANA" бағдарламасы жүзеге асырылып жатыр. Бұл туралы Наурызбай аудандық "Бақытты отбасы" орталығының жетекшісі Сана ЖАНДАЙ онлайн брифингте айтты, деп хабарлайды ҚазАқпарат тілшісі.
"ISKER ANA" бағдарламасымен көпбалалы аналарға заңгерлік және психологиялық көмектен бөлек, кәсіпкерлік негіздері бойынша грант немесе микрокредит беру қарастырылған.
"Көпбалалы аналарға ұсынатын қызмет түрі өте көп. Мысалы, былғары өндірісінен бастап консервіленген өнімдерді дайындау, клининг бизнесі, тігін ісі және басқасы бар", - деп атап өтті С. Жандай.
Биыл көпбалалы және аз қамтылған отбасыларды жұмысқа орналастыру және жеке бизнесін дамыту мақсатында демеушілер арқылы Әуезов ауданында қолдан шыққан тоқыма және азық-түлік өнімдерін сату үшін 4 сауда нүктесі, атап айтқанда, "Тиграхауд", "Арыстан" сауда үйлерінде киім сату орындары, "Сарыарқа" және "Арыстан" базарларында азық-түлік нүктесі ашылды. Алмалы ауданында "Әлеуметтік тігін цехы" өз жұмысын бастады.
"Сонымен бірге, Түрксіб ауданында көпбалалы аналардың қолдан жасаған тауарларын сататын "Іскер ана" сауда үйі ашылды. Сауда үйінде заманауи стильдегі ұлттық костюмдер, құрақ-көрпе, ұлттық нақыштағы әшекейлер, әйелдерге арналған киімдер сатылымға қойылды, сондай-ақ киімдерді өңдеу және жөндеу бойынша қызметтер қарастырылған",– деді спикер.
Айта кетейік "Бақытты отбасы" орталықтары 2019 жылдың тамыз айынан бастап Алматының барлық аудандарында жұмыс істейді.
Онда көпбалалы және аз қамтылған отбасыларға "бір терезе" қағидаты бойынша көмек көрсетіледі.
Фото: Kazinform.
