Алаяқтарға алданып қалмаңыз
Асеке – ойдан шығарылған адам дегенмен, оның басына туған күн сіз бен бізге де келіп тұрмасын.
Күн жексенбі еді. Асекең диванда аяғын көтеріп қойып, Instagram-ды қопарып қарап жатыр. Су жаңа мәшине алған күйеу баласының көлікпен түскен суреттері қайта-қайта жылтыңдап қоймады. Мәшинесі күшті екен, - деді мұның телефонындағы суретті байқап қойған әйелі де.
Асекеңнің іші күйеді. Сау жері қалмаған ескі Тойотамен қашанғы жүрер екенмін деп.
Сол сәтте бұған саңқ етіп бір смс-хабар келіп түсті:
"Құттықтаймыз! СІЗ біздің банкіміздің 5-жылдығына орай арнайы акциядан БАС ЖҮЛДЕ ұтып алдыңыз! Жүлдені алу үшін сілтемені басыңыз…"
Сілтемені басқаны сол екен, Асекеңе өте таныс банктің сайтына қатты ұқсайтын сайт ашылды. Онда бақырайған жазу тұр: "Жүзден астам сыйлық ойнатылады! Бас жүлде – АВТОКӨЛІК"!
Құдай маған да берді! Ақыры менің де жолым болды! – деген Асекең тіпті терлеп кетті.
Әлгі парақша жүйеге кіру үшін авторизация сұрады. "Реквизиттерім қайсы еді", - деген Асеке өз картасындағы жеке деректерді енгізе берді. Ең соңында "enter" деген батырманы басып жіберді!
Әлгі парақша ойланып қалды, бірнеше минут өтті, ештеңе ашылған жоқ. Ал Асекең шыдамай барады, қандай көлік ұттым екен, түсі қандай, қай жерден алып кетемін деген ой мазалайды…
Тағы біраз уақыт өтті. Үйде өзі интернет істеп тұр ма? Істеп тұр екен.
Телефонымды өшіріп, қайта қосайын ба? Онда менің енгізген деректерім жоғалып, жүлдеден айырылып қалмаймын ба? Басы қатып кетті.
Асекең сосын банкке хабарласты…
Әрине, бұл сәтте оның шоттарында ендігі түк қалмап еді. Асекең солай ақшасыз қалды.
Сондықтан Асекең сияқты болмай, көрінген сілтемелерді аша беруге болмайды!
Фото: ашық дереккөзден.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
