Атамекен" ҰКП басқарма төрағасының орынбасары жоғары білім мамандықтары арасындағы танымал бағыттарды атады
"Атамекен" ҰКП басқарма төрағасының орынбасары Олжас Ордабаев отандық еңбек нарығында сұранысқа ие болған мамандықтар тізімін атады, деп хабарлайды ҚазАқпарат.
"Жұмыс орындарына келсек, қазір механизаторлар, жүргізушілер, аспаздар, тәрбиешілер, тігіншілер, сауда өкілдері, даяшылар көп сұранысқа ие. Көп жағдайда мұнда колледж түлектері жұмыс істейді және бірқатар санат арнаулы білімді талап етпейді", - деді О. Ордабаев "ЖОО рейтингі: Қазақстандағы ең жоғарғы және төменгі көрсеткіштер" онлайн конференциясында.
Сонымен бірге, спикер жоғары білім мамандықтары арасындағы танымал бағыттарды атады.
"Жоғары білім бойынша агрономия, құрылыс, менеджмент, есеп пен аудит, жалпы медицина мамандықтары танымал. Әсіресе, агроном, инженер-смета, инженер-жобалаушы, жарнама бойынша менеджер, есепші, экономист, психолог, жалпы практика дәрігерлеріне жұмыс орны көп. Ауыл шаруашылығы мамандарына үлкен сұраныс бар екенін көріп отырмыз, өкінішке қарай бұл мамандықта оқыған түлектер ауылға бармайды", - деді Олжас Ордабаев.
